FL Group ekki undir neinum þrýstingi

Vísir sagði frá því í dag að FL Group væri undir miklum þrýstingi að selja hlut sinn í dönsku bruggverksmiðjunni Royal Unibrew.

Vísir var þar að vitna í viðskiptasíðu blaðsins Berlingske frá því í dag. Blaðið hafði eftir heimildum bæði í Reykjavík og Kaupmannahöfn að slæmt uppgjör FL Group á 3ja ársfjórðungi gerði það að verkum að félagið yrði að losa sig við 25,5% hlut sinn í Unibrew.

Halldór Kristmannsson, framkvæmdastjóri samskiptasviðs FL Group sagði hinsvegar nú í kvöld að fullyrðingar Berlingske séu fráleitar. "Við erum ekki undir neinum þrýstingi að selja eign okkar í Royal Unibrew þrátt fyrir að tímabundnar sveiflur séu nú í gengi bréfa félagsins. Þessi iðnaður hefur að undanförnu dregist saman og eigum við von á því að það sé tímabundið en samdrátturinn skýrist m.a. af reykingarbanni í Skandinavíu og veðurskilyrðum í Vestur Evrópu. Margir af okkar samkeppnisaðilum hafa nú þegar tilkynnt um væntanlega minnkandi sölu á seinni hluta ársins. Við sjáum til lengri tíma ágæt tækifæri í okkar fjárfestingu í Royal Unibrew sem er leiðandi fyrirtæki á sínu sviði á Norðurlöndunum," sagði Halldór og bætti við:

"Við munum áfram leitast við að vinna með stjórnendum félagsins og koma okkar sjónarmiðum á framfæri en við teljum að tækifæri séu til þess að efla rekstur Royal Unibrew og minnka kostnað eins og stjórnendur félagsins eru nú að kynna fyrir fjárfestum."