Læknar Díönu athuguðu ekki óléttu

Læknarnir sem reyndu að bjarga lífi Díönu eftir áreksturinn í París gerðu ekki á henni óléttupróf. Þetta kom fram í dag við réttarannsókn sem fram fer á dauða Díönu þessa dagana.

Prinsessan var það illa slösuð er hún kom á Pitie Salpetriere sjúkrahúsið að líkur hennar á lífi voru nánast engar.

Prófessor Bruno Riou sem borið hefur saman röntgenmyndir af Díönu segir ómögulegt að sjá hvort hún hafi verið með barni.

Innvortis blæðingar voru miklar og settu mikinn þrýsting á hjarta hennar og lungu. Skömmu áður en gera átti aðgerð á prinsessunni stoppaði hjarta hennar í annað sinn.

Næsta einn og hálfan tímann voru læknar að reyna að lífga hana við. Gáfu þeir henni nokkrar adrenalínsprautur og raflost en án árangurs.

Ferð hennar á sjúkrahúsið mun hafa gengið hægt fyrir sig en prófessorinn segir að í fjórum af fimm svipuðum tilfellum hefðu sjúklingar lifað af.

Mohamed al Fayed faðir Dodi sem var ástmaður Díönu og lést með henni er fullviss um að prinsessan hafi verið þunguð. Og vill meina að óléttupróf hafi verið tekið um nóttina.

Prófessorinn segir hinsvegar að ólíklegt sé að óléttupróf hafi verið tekið um nóttina þar sem læknar einbeittu sér frekar að því að halda henni á lífi.

Mohamed er handviss um að sonur sinn og Díana hafi verið myrt af leynisveitum konungsfjölskyldunnar svo móðir verðandi konungs ætti ekki barn með múslima.