Margrét Lára tryggði Kristianstad sigur og toppsætið

Margrét Lára Viðarsdóttir heldur áfram að skora fyrir Kristianstad í sænsku kvennadeildinni í fótbolta en hún skoraði í dag eina mark leiksins í 1-0 sigri Kristianstad á Tyresö. Með þessum sigri komst Kristianstad-liðið í toppsætið á betri markatölu en Umeå og LdB FC Malmö. Malmö á leik inni seinna í kvöld.

Mark Margrét Láru kom úr vítaspyrnu strax á 15. mínútu leiksins.

Margrét Lára er einnig orðinn markahæsti leikmaður sænsku deildarinnar með sex mörk í fyrstu sex umferðunum. Margrét Lára lék allan leikinn alveg eins og Sif Atladóttir, Guðný Björk Óðinsdóttir og Erla Steina Arnardóttir.

Elísabet Gunnarsdóttir er að gera flotta hluti með lið Kristianstad sem hefur unnið fjóra af fyrstu sex leikjum sínum í sumar.