Serbneski þjálfarinn sleppur við refsingu

Sasa Boskovic, þjálfari kvennaliðs Serbíu í handbolta, var í kastljósinu í gær þegar sýndar voru myndir af honum toga í leikmann norska landsliðsins sem var inni á vellinum. Baskovic togaði í keppnistreyju Linn Jørum Sulland, hægri hornamanns Norðmanna – og hann togaði einnig í höndina á henni. Í myndbandinu hér fyrir ofan - má sjá hvernig Boskovic bar sig að við hliðarlínuna.

Boskovic gerði þetta margoft í leiknum og lögðu forráðamenn norska landsliðsins inn óformlega kvörtun til Handknattleikssambands Evrópu. EHF fór yfir málið í gær og komst að þeirri niðurstöðu að ekki væri hægt að gera neitt í málinu, þar sem að Norðmenn sendu ekki inn formlega kæru eða kvörtun. Dómarar leiksins og eftirlitsmaður greindu ekki frá þessu atviki í skýrslu sinni um leikinn.

EHF hefur farið yfir myndbandsupptöku frá atvikinu þar sem Boskovic fer ekkert í felur með gjörðir sínar. Það dugir ekki til og sleppur Boskovic með þessa ótrúlegu uppákomu þrátt fyrir EHF hafi lýst því yfir að framferði hans sé óásættanlegt.