Hrafnhildur: Forréttindi að fá þennan úrslitaleik

„Þetta er búinn að vera góður dagur. Við erum búnar að fá að fara niður í bæ og ná að rölta aðeins um Vrsac. Við erum bara búnar að hafa það kósí og fórum meira segja og fengum okkur pizzu," sagði Hrafnhildur Skúladóttir, fyrirliði íslenska kvennalandsliðsins, um daginn í gær þar sem íslenska liðið reyndi að safna orku fyrir átökin á móti Rússum í kvöld.

Hrafnhildur viðurkenndi að Rúmeníuleikurinn hafi setið í henni og fleirum í liðinu en íslenska liðið tapaði þá í spennuleik.

„Þetta var ótrúlega sorglegt. Maður þurfti aftur svefntöflu til að sofna í gær því það var ekki auðvelt. Það er samt bara létt yfir mannskapnum miðað við leikinn í gær," sagði Hrafnhildur.

„Það eru forréttindi að fá þennan úrslitaleik. Við hefðum getað verið úr leik og þá hefði andinn verið allt öðruvísi. Við hefðum alltaf farið inn í leikinn til þess að vinna en við höfum til alls að vinna núna. Við komust í milliriðli ef við vinnum þennan leik og náum þá markmiðum okkar," sagði Hrafnhildur.

„Við höfum ekki riðið feitum hesti frá síðustu viðureignum við Rússana en við áttum hörkuleik við þær fyrstu 40 mínúturnar á HM í Brasilíu í fyrra þar til að blaðran sprakk hjá okkur. Það var rosalega magnað hvernig við hlupum á vegg allt í einu," sagði Hrafnhildur.

„Í þeim leik þá erum við að ná að fá auðveld mörk eftir hörkuvörn. Við eigum ekki möguleika á móti þeim nema að við fáum fleiri auðveld mörk en í síðustu leikjum. Það er klárt mál. Við þurfum virkilega að gefa allt og geta hlaupið á morgun," sagði Hrafnhildur.

Hrafnhildur fékk dæmdan á sig mjög ósanngjarnan ruðning í leiknum á móti Rúmeníu og steinlá á eftir. Hún grínaðist með það að lungun hefðu fallið saman en segist vera í lagi. „Ég er nokkuð spræk miðað við aldur og fyrri störf," sagði Hrafnhildur kát að vanda.