Gagnrýni á sjóræningjaveiðar tvískinnungur

Gagnrýni útgerðarmanna á svokallaðar sjóræningjaveiðar á Reykjaneshrygg helgast af tvískinnungi að mati Grétars Mar Jónssonar, Frjálslynda flokknum, en hann er jafnframt fyrrverandi formaður Farmanna- og fiskimannasambandsins. Grétar telur að menn ættu að líta sér nær því enginn munur væri á Smuguveiðum Íslendinga og veiða nefndra sjóræningjaskipa á Reykjaneshrygg.

Forystumenn Landssambands útgerðarmanna gera nú kröfu til þess að gæsluskipin beiti klippunum á svokölluð sjóræningjaskip sem veiða karfa á alþjóðlegu hafssvæði rétt utan lögsögunnar á Reykjaneshrygg. Dómsmálaráðherra mun íhuga að gefa grænt ljós á klippunotkun.

Á meðan er verið að beita aðgerðum gegn birgðarskipum sem hafa lestað fisk úr togurnunum á hafi úti. Í gær sendi utanríkisráðuneytið japönskum stjórnvöldum athugasemd vegna birgaðskips sem var að koma til hafnar í Japan með 4000 tonn af fiski frá Reykjaneshrygg. Skipið heitir Polestar og er skráð í Panama og hafa aðildarríki Norðuratlantshafsfiskveiðiráðsins sett skipið á svartan lista. Eftir því sem næst verður komist hætti Polestar við að landa í Japan eftir að málum var hreyft af íslenskum stjórnvöldum.

En það eru ekki allir þeirrar skoðunar að íselndingar hafi rétt til að beita klippum á Reykjaneshrygg. Þannig telur Grétar Mar Jónsson, fyrrverandi formaður Farmanna- og fiskimannasambandsins og varaþingmaður Frjálslyndra að Íslendingar ættu að líta sér nær. Þannig væri enginn munur á veiðum þessara svokölluðu sjóræningjaskipa á Reykjaneshrygg og veiða Íslendinga í Smugunni á sínum tíma.

Íslendingar hafi því sjálfir gerst sekir um sjóræningjaveiðar og sé vandlæting í garð skipana á Reykjaneshrygg því tvískynnungsháttur af verstu sort að mati Gretars Mar.