Viðsnúningur hjá Booker í Bretlandi

Booker, heildsölukeðjan í Bretlandi skilaði afbragðsgóðri afkomu á síðasta fjárhagsári. Baugur Group og eignarhaldsfélagið Fons eiga um 30 prósenta hlut í Booker. Á heimasíðu fyrirtækisins er greint frá því að hagnaður hafi stóraukist í kjölfar aukinnar sölu á tímabilinu, þrátt fyrir að blikur séu á lofti í verslunargeiranum.

Viðsnúning fyrirtækisins, sem gekk inn í Blueheath í fyrra, má fyrst og fremst rekja til aukinnar sölu til veisluþjónustu og smásala í matvöruverslanarekstri. Salan jókst um 2,4 prósent og velti fyrirtækið 31 milljarði punda.

Hagnaður fyrir skatta jókst um 27 prósent og nam hann 36,2 milljónum punda eða rúmum fimm milljörðum íslenskra króna. Arður til hluthafa nam átta milljónum punda.

Charles Wilson, forstjóri Booker, segir að árið hafi verið stöðugt og að hann taki eftir aukinni ánægju á meðal viðskiptavina keðjunnar. Þá bendir hann á í frétt á heimasíðu fyrirtækisins að tekist hafi að grynnka á skuldum um 38 prósent á tímabilinu. „Booker hefur bætt sig verulega á síðastliðnum tveimur árum," segir Wilson. „Í september 2005 skuldaði fyrirtækið 361 milljón punda og salan dróst saman um sex prósent og hagnaður hafði sömuleiðis minnkað."

Hann segir að í nóvember sama ár hafi verið skipt um stjórn í félaginu og þriggja þátta áætlun mótuð til að snúa dæminu við. „Sú áætlun er að ganga eftir og í dag eru skuldir 47 milljónir punda, salan eykst stöðugt og hagnaður af rekstri hefur aukist um 29 prósent," segir Wilson.