Betra samfélag: Við þurfum að vinna saman

Við þurfum að hjálpast að við uppbyggingu og þróun betra samfélags. Í því sambandi er meðal annars mikilvægt að við höfum á að skipa ábyrgu forystufólki, á öllum sviðum, sem leggur áherslu á samfélagsábyrgð og hefur það sem meginmarkmið að þjóna samfélaginu, auk þess að hafa hugrekki til að framkvæma og leiða með heilindi að leiðarljósi.

Þetta kann að hljóma einfalt en er erfiðara í framkvæmd og mannskepnan virðist oft gleyma sér eða hreinlega taka meðvitaða ákvörðun um að setja eigin hagsmuni á oddinn og sniðganga hagsmuni annarra. Við höfum séð fjöldamörg dæmi um þetta síðustu ár, til dæmis hafa eigendur og stjórnendur ýmissa fyrirtækja eingöngu eða mestmegnis hugsað um eigin hag og ekki hirt um hvernig öðrum reiðir af eða hvaða afleiðingar gjörðir þeirra hafa á starfsfólk, hluthafa og/eða samfélagið almennt.

Siðferðileg forysta

Einn mikilvægur þáttur í að tryggja okkur ákveðin lífsgæði er fagleg forysta sem byggir á góðu siðferði. Í þessu samhengi þurfum við að hafa í huga að þetta er sameiginlegt verkefni okkar allra. Fagleg og siðferðileg forysta gengur ekki út á að setja ákveðna einstaklinga á stall, fela þeim óskoruð völd og bíða svo eftir að þeir reddi málum. Það kann að hljóma sem klisja en það sem þarf er samvinna sem byggir á heilindum, siðferðilegri framsýni og framkvæmdagleði, þ.s. fólk er reiðubúið að axla ábyrgð og bæði þjóna og leiða í samfélaginu. Þetta felur m.a. í sér að viðurkenna mistök, leitast við að læra af þeim og hafa metnað og hugrekki til að vinna gegn ranglæti ásamt því að skoða vel og meta mögulegar afleiðingar þeirra ákvarðana sem við tökum.

Það er reyndar mikið gleðiefni að víða finnur maður jákvæðan kraft í samfélaginu og ekki virðist lengur eðlilegt að gera lítið úr áherslum á heilindi og kærleika. Já, ég segi kærleika því hann er grunnurinn að öllu. Okkur má ekki vera sama um náungann, um samfélagið okkar. Kærleikurinn er kraftur sem fer aldrei úr tísku og er þegar á botninn er hvolft eitt kraftmesta og jákvæðasta fyrirbæri sem fyrirfinnst.

Málið er í raun sáraeinfalt, við þurfum að starfa af heilindum og vinna saman.