SA vísar gagnrýni flugvirkja á bug

Flugvirkjafélag Íslands sakar Samtök atvinnulífsins um að bjóða í leðjuslag með því að setja fram þróun launakjara flugvirkja með villandi hætti. SA segir launakröfur flugvirkja alltof háar og enn sé langt á milli aðila. Flugvirkjar hafa boðað verkfall þann 16. júní.

Engin sátt virðist í sjónmáli í kjaradeilu Icelandair og flugvirkja sem áforma verkfall um miðjan júní. Samtök atvinnulífsins sendu frá sér tilkynningu í gær og segja að flugvirkjar fari fram á 30% launahækkun. SA segja að laun flugvirkja hafi hækkað um tæp 62% frá 2007 á meðan laun hjá félagsmönnum ASÍ hafi hækkað um 38,5% á sama tímabili.

Flugvirkjafélag Íslands gagnrýnir framsetningu SA harðlega í tilkynningu sem félagið sendi frá sér í dag. Sú aðferðafræði sem SA beiti í málflutningi sínum sé ekkert annað en ósmekklegar rangfærslur og útreikningur sé fjarri raunveruleikanum.

„Við vísum því á bug,“ segir Þorsteinn Víglundsson þegar hann er spurður um hvort að SA bjóði í leðjuslag. „Við erum einfaldlega að bera saman launaþróun flugvirkja við aðra hópa í samfélaginu með nákvæmlega sama hætti og við stóðum sameiginlega að með ASÍ síðastliðið haust. Við gerðum það sama þegar við bárum saman launaþróun flugmanna og flugfreyja og þetta er sambærileg aðferðarfræði og við höfum notað til að reikna vísitölu hagstofunnar.“

Launakröfur langt umfram almennar launahækkanir

Samningafundur var haldinn í dag en lítið þokaðist í viðræðunum. Næsti fundur í deilunni er boðaður á þriðjudag. Þorsteinn segir að allt kapp verði lagt á að koma í veg fyrir frekari verkföll á flugvöllum landsins.

„Það er hins vegar mikið áhyggjuefni að tiltölulega fámennar stéttir sé hver ofan í aðra að beita verkfallsvopni til að knýja fram launabreytingar sem eru langt umfram það sem gengur og gerist í samfélaginu í almennt. Þar með hlýtur maður að spyrja sig á hvaða grundvelli launakröfurnar eru reistar og hvort að það sé rétt að knýja slíkar kröfur fram með verkfalli sem bítur mjög á allt samfélagið,“ segir Þorsteinn.