Martin stigahæstur í sigri Alba Berlin

Martin Hermannsson var stigahæstur hjá Alba Berlin sem vann öruggan sigur á Baskonia, 81-57, í EuroLeague í kvöld.

Martin skoraði 18 stig í leiknum. Hann hitti úr sex af tíu skotum sínum innan teigs og tveimur af fjórum þriggja stiga skotum sínum. Martin gaf einnig þrjár stoðsendingar.

Sigur Alba Berlin var mjög öruggur. Liðið var 15 stigum yfir í hálfleik, 41-26, og vann á endanum 24 stiga sigur, 81-57.

Þetta var fyrsti sigur Alba Berlin í EuroLeague síðan 28. nóvember. Liðið er í 16. sæti deildarinnar af 18 liðum.

Martin hefur aðeins einu sinni skorað fleiri stig í leik í EuroLeague en í kvöld. Hann skoraði 20 stig í sigri á Panathinaikos 14. nóvember.