Olísdeildarspáin 2019/20: KA með nánast sama lið og endar í sama sæti

Handboltatímabilið 2019 til 2020 hefst eftir aðeins tólf daga. Íþróttadeild Vísis og Stöðvar 2 Sports telur niður í Olís deildina í handbolta með því að birta spá okkar um lokastöðuna í deildinni. Olís deild karla hefst 8. september næstkomandi og nú er komið að fjórða liðinu í spá okkar.

Spá Vísis og Stöðvar 2 Sports fyrir Olís deild karla 2019-20

1. sæti

2. sæti

3. sæti

4. sæti

5. sæti

6. sæti

7. sæti

8. sæti - (28. ágúst)

9. sæti - KA

10. sæti - HK

11. sæti - Fram

12. sæti - Fjölnir

Íþróttadeild spáir KA 9. sæti deildarinnar, sama sæti og liðið lenti í á síðasta tímabili. Eftir að hafa verið hluti af Akureyrarliðinu í ellefu ár byrjaði KA að spila aftur undir eigin merkjum tímabilið 2017-18. KA vann sér strax sæti í Olís-deildinni og á síðasta tímabili var liðið nálægt því að komast í úrslitakeppnina.

KA mætir með nánast sama lið til leiks og á síðasta tímabili. Heimir Örn Árnason er reyndar hættur, þangað til annað kemur í ljós, og hann skilur eftir sig stórt skarð í vörninni sem var sterk á síðasta tímabili.

KA átti tvo af þremur markahæstu leikmönnum deildarinnar á síðasta tímabili. Þeir Tarik Kasumovic og Áki Egilsnes skoruðu samtals 270 mörk, eða nær helming marka KA. Fleiri þurfa að leggja í púkkið í sókninni í vetur.

KA-menn ættu ekki að lenda í fallbaráttu og setja væntanlega stefnuna á að komast í úrslitakeppnina. Til að það náist þarf að KA-heimilið að enn meiri gryfju. KA vann bara fjóra heimaleiki í fyrra. Aðeins botnlið Gróttu vann færri (1).



Komnir/Farnir:

Komnir:

Daníel Örn Griffin frá ÍBV

Patrekur Stefánsson frá Akureyri

Farnir:

Heimir Örn Árnason hættur

HBStatz tölurnar frá síðasta tímabili

Sóknarleikur KA 2018/19 í tölum HBStatz

Mörk skoruð í leik - 9. sæti (25,9)

Skotnýting - 10. sæti (55,5%)

Vítanýting - 6. sæti (73%)

Hraðaupphlaupsmörk - 8. sæti (53)

Stoðsendingar í leik - 10. sæti (9,0)

Tapaðir boltar í leik - 8. sæti (8,6)

Vörn og markvarsla KA 2018/19 í tölum HBStatz

Mörk fengin á sig í leik - 7. sæti (26,9)

Hlutfallsmarkvarsla - 6. sæti (30,3%)

Varin víti - 1. sæti (22)

Stolnir boltar - 4. sæti (82)

Varin skot í vörn - 9. sæti (40)

Lögleg stopp í leik - 2. sæti (21,6)

Líklegt byrjunarlið KA í vetur

Markvörður - Jovan Kukobat - 32 ára

Vinstra horn - Dagur Gautason - 19 ára

Vinstri skytta - Tarik Kasumovic - 27 ára

Miðja - Jón Heiðar Sigurðsson - 28 ára

Hægri skytta - Áki Egilsnes- 23 ára

Hægra horn - Allan Norðberg - 25 ára

Lína - Daníel Matthíasson - 25 ára

Varnarmaður - Daði Jónsson - 22 ára

Fylgist með

Einar Birgir Stefánsson (f. 1997) átti nokkra ágæta leiki í fyrra og lofaði góðu á köflum. Þess á milli datt hann of langt niður.

Einar er stór og stæðilegur línumaður sem hefur margt til brunns að bera. Línuspilið var ekkert sérstakt hjá KA-mönnum á síðasta tímabili og þeir þurfa að vera duglegri að finna Einar og hann sömuleiðis að nýta færin sín.

Þjálfarinn

KA er eina lið deildarinnar sem er með tvo þjálfara. Líkt og síðustu tvö tímabil er Stefán Árnason við stjórnvölinn hjá KA. Meðþjálfari hans í vetur verður Jónatan Magnússon.

Hann stýrði KA/Þór með góðum árangri um þriggja ára skeið. Á síðasta tímabili endaði liðið í 5. sæti Olís-deildar kvenna sem nýliði. Jónatan var einnig aðstoðarþjálfari Axels Stefánssonar með íslenska kvennalandsliðið. Hann lék með KA á árum áður og varð m.a. Íslandsmeistari með liðinu 2002.

Þrátt fyrir að vera yngsti þjálfarinn í Olís-deildinni í vetur býr Stefán yfir mikilli reynslu. Áður en hann tók við KA, sínu uppeldisfélagi, var stýrði hann Selfossi, kom liðinu upp í Olís-deildina og í úrslitakeppnina í fyrsta sinn í 21 ár.



Hvað segir sérfræðingurinn?„KA er annað lið sem er að gera aðeins breytingar á þjálfarateymi sínu. Jónatan Magnússon kemur inn og hann er búinn að vera gera mjög flotta hluti með KA/Þór. Ég er búinn að heyra mjög fína hluti um hann og það er því spennandi að sjá hvernig hann kemur inn í deildina. KA festi sig í sessi eftir að hafa komið upp í fyrra og það var allt mjög skemmtilegt hjá þeim, bæði umgjörðin og liðið,“ segir Jóhann Gunnar Einarsson, sérfræðingur Stöðvar 2 Sports, um KA-liðið.

„Það er gaman að heyra að allir útlendingarnir ætli að vera áfram því þeir eru skemmtilegir á velli og karakterar. Það er gaman af þeim. Þeir fá til sín Patrek frá Akureyri og Daníel Griffin. Það er erfitt að fá menn norður en ég held að þeir hafi gert ágætlega með þessu. Þetta eru ekki menn sem eiga að vera einhverjar stórstjörnur heldur eiga að smella inn í þetta lið sem hjálpar þeim við það að taka næsta skref áfram. Ef þeir halda heimavellinum góðum þá ættu þeir að gera kröfu á það að komast í úrslitakeppnina,“ segir Jóhann Gunnar.

Hversu langt síðan að KA ...

... varð Íslandsmeistari: 17 ár (2002)

... varð deildarmeistari: 18 ár (2001)

... varð meðal þriggja efstu í deildinni: 18 ár (2001)

... varð bikarmeistari: 15 ár (2004)

... komst í bikarúrslit: 15 ár (2004)

... komst í úrslitakeppni: 14 ár (2005)

... komst í undanúrslit: 15 ár (2004)

... komst í lokaúrslit: 17 ár (2002)

... féll úr deildinni: 35 ár (1984)

(Lék undir merkjum Akureyrar frá 2006-2017)

... kom upp í deildina: 1 ár (2018)

Gengi KA í deildarkeppninni undanfarin átta tímabil

2018-19  9. sæti í deildinni

2017-18  B-deild (2. sæti)

2016-17  Hluti af Akureyrarliðinu (10. sæti)

2015-16  Hluti af Akureyrarliðinu (8. sæti)

2014-15  Hluti af Akureyrarliðinu (6. sæti)

2013-14  Hluti af Akureyrarliðinu (6. sæti)

2012-13  Hluti af Akureyrarliðinu (6. sæti)

2011-12  Hluti af Akureyrarliðinu (3. sæti)

Gengi KA í úrslitakeppninni undanfarin átta tímabil

2018-19  Ekki í úrslitakeppni

2017-18  B-deild

2016-17  Hluti af Akureyrarliðinu (Ekki í úrslitakeppni)

2015-16  Hluti af Akureyrarliðinu (8 liða úrslit)

2014-15  Hluti af Akureyrarliðinu (8 liða úrslit)

2013-14  Hluti af Akureyrarliðinu (Ekki í úrslitakeppni)

2012-13  Hluti af Akureyrarliðinu (Ekki í úrslitakeppni)

2011-12  Hluti af Akureyrarliðinu (Undanúrslit)

Að lokum

KA hefur nánast ekkert styrkt sig frá síðasta tímabili. Á móti kemur að liðið ætti ekki þurfa neinn tíma til að spila sig saman.

KA var aðeins einu stigi frá því að komast í úrslitakeppnina á síðasta tímabili og KA-menn eru ekki langt frá liðunum í 6.-8. sæti að getu.

Þeir þurfa hins vegar að bæta sóknarleikinn og finna leiðir til nýta Dag Gautason betur. Þessi stórefnilegi hornamaður fékk úr alltof litlu að moða á síðasta tímabili. Kasumovic er gríðarlega öflug skytta en er hornablindur. Línuspilið þarf líka að vera mun betra en í fyrra og þá þurfa KA-menn að nýta skotin sín betur. Aðeins tvö lið voru með lakari skotnýtingu en KA á síðasta tímabili.

KA spilar ákveðinn og beittan varnarleik og ef hann verður svipaður og í fyrra til viðbótar við aðeins betri markvörslu og fjölbreyttari sóknarleik ætti KA að geta komist í úrslitakeppnina.