Skagamenn niðurlægðu Stjörnuna

ÍA gerði sér lítið fyrir og burstaði Stjöruna í kvöld er liðin mættust í Lengjubikarnum. Lokatölur urðu 6-0 sigur Skagamanna sem eru nýliðar í Pepsi-deildinni á komandi leiktíð.

Fyrsta markið skoraði Gonzalo Zamorano Leaon á fjórtándu mínútu leiksins og ÍA var komið í 2-0 eftir hálftíma leik. Þórarinn Ingi Valdimarsson skoraði þá sjálfsmark.

Þriðja markið kom á 37. mínútu en Þórður Þorsteinn Þórðarson skoraði það og Skagamenn með góða forystu er liðin gengu til búningsherbergja.

Veisla Skagamanna hélt áfram í síðari hálfleik því á 64. mínútu skoraði Viktor Jónsson og á síðustu sex mínútunum bætti Gonzalo við tveimur mörkum. Lokatölur 6-0.

Ótrúlegar tölur í Kórnum í kvöld en Skagamenn eru því með sex stig í riðli eitt í Lengjubikarnum en Stjörnumenn þrjú.

Úrslit og markaskorarar eru frá úrslit.net.