Lukaku verður ekki með gegn Inter

Ole Gunnar Solskjær gaf út í dag að Romelu Lukaku myndi ekki spila fyrir Manchester United í æfingaleiknum við Inter Milan í Singapúr á morgun.

Í allt sumar hefur Lukaku verið sterklega orðaður við Inter en félögunum gengur illa að ná saman.

Solskjær sagði á blaðamannafundi fyrir leik liðanna í International Champions Cup að Belginn væri ekki tilbúinn í leikinn.

Þegar Norðmaðurinn var spurður út í gang mála í tengslum við möguleg vistaskipti Lukaku sagðist hann ekki hafa neitt nýtt til þess að greina frá frá síðasta blaðamannafundi sínum.

Leikur Manchester United og Inter Milan verður í beinni útsendingu á Stöð 2 Sport á morgun, laugardag, klukkan 11:25.