Sissoko: Áttum sigurinn skilið

Mousa Sissoko var ánægður með stigin þrjú sem Frakkar tóku af Laugardalsvelli í kvöld.

Frakkar unnu 1-0 sigur á Íslandi í undankeppni EM 2020, en sigurmarkið kom úr vítaspyrnu.

„Mér fannst þetta góður leikur hjá báðum liðum. Við vissum að þetta yrði erfiður leikur, bæði lið reyndu að vinna hann en mér fannst við eiga stigin þrjú skilið,“ sagði Sissoko við Henry Birgi Guðmundsson eftir leikinn á Laugardalsvelli.

„Við vissum að þetta yrði erfitt, við höfum mætt þeim nokkrum sinnum. En við sýndum karakter og áttum sigurinn skilið.“

Sissoko gat ekki sagt til um hvort vítaspyrnudómurinn var réttur dómur.

„Ég var langt frá þessu í sannleika sagt. Það er erfitt að segja til um hvort þetta var víti, en dómarinn tók ákvörðunina og þetta var rétt ákvörðun fyrir okkur.“