Golf

Tiger vann sinn leik en bandaríska liðið er 4-1 undir í Forsetabikarnum: „Þetta er ekki búið“

Óskar Ófeigur Jónsson skrifar
Tiger Woods og Fred Couples voru áhyggjufullir á blaðamannafundi eftir fyrsta daginn.
Tiger Woods og Fred Couples voru áhyggjufullir á blaðamannafundi eftir fyrsta daginn. Getty/Darrian Traynor

Alþjóðlega liðið er komið í 4-1 eftir fyrsta daginn í Forsetabikarnum í golfi en keppnin hófst í Ástralíu í nótt.

Þetta er í fyrsta sinn í heil fjórtán ár þar sem alþjóðlega liðið tekur forystuna í Forsetabikarnum en bandaríska liðið hefur unnið þennan bikar allar götur síðan á síðustu öld.

Fyrir tveimur árum vann alþjóðlega liðið aðeins tvo leiki í allri keppninni en þeir hafa þegar unnið tvisvar sinnum fleiri leik í ár og það þótt aðeins sé búinn fyrsti dagur af fjórum.

Tiger Woods er fyrirliði bandaríska liðsins og tók þátt í fjórleiknum á fyrsta degi. Tiger lék með Justin Thomas og þeir unnu þá Joaquín Niemann og Marc Leishman í alþjóðlega liðinu með sannfærandi hætti.

Tiger fékk fugl á fyrstu tveimur holunum og bandaríska tvíeykið var yfir allan tímann. Þeir tryggðu sér síðan sigurinn þegar þrjár holur voru eftir en þá voru Tiger Woods og Justin Thomas fjórum höggum yfir.  


Vandræðin voru öll hjá lærisveinum Tigers því allir hinir kylfingarnir í bandaríska liðunu voru í vandræðum og bandaríska liðið tapaði öllum hinum fjórum fjórleikjunum.

Það er aðeins búið að keppa um 5 stig af 30 og það er því enn nóg eftir í keppninni sem er sýnd beint á Stöð 2 Golf.  „Við þurfum að fara út á völl og vinna fyrir bikarnum. Þetta er ekki búið og það er nóg eftir enn. Þetta er löng vika,“ sagði Tiger Woods sem er ekki búinn að gefast upp.

12 af 24 bestu kylfingum heims eru í liði Bandaríkjanna og þar eru því nóg af hæfileikum til þess að snúa þessu við. Það fylgir samt sögunni að lið sem hefur komist þremur yfir eftir fyrsta dag hefur aldrei tapað í sögu Forsetabikarsins og reyndar ekki í sögu Ryder-bikarsins heldur.

Fjórleikir fimmtudagsins í Forsetabikarnum
Niemann/Leishman     4 & 3     Woods/Thomas
Im/Hadwin     1 yfir     Cantlay/Schauffele
An/Scott     2 & 1     Finau/DeChambeau
Pan/Matsuyama     1 yfir    Reed/Simpson
Oosthuizen/Ancer     4 & 3     Woodland/Johnson

Staðan: Alþjóðlega liðið 4-1 Bandaríkin

Keppnin í dag hefst á miðnætti á Stöð 2 Golf. Í dag verður keppt í fjórmenningi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.