Lífið

„Ein besta ákvörðun sem ég hef tekið“

Sylvía Rut Sigfúsdóttir skrifar
Eva Laufey skellti sér á námskeið hjá Le Cordon Bleu.
Eva Laufey skellti sér á námskeið hjá Le Cordon Bleu. Myndir/Úr einkasafni

„Þetta ár hefur verið ótrúlega sérstakt og mikið búið að vera í gangi, ég tók þess vegna ákvörðun að gera eitthvað sérstaklega fyrir mig vegna þess að ég fann þörf til þess að læra eitthvað nýtt,“ segir Eva Laufey Kjaran Hermannsdóttir í samtali við Vísi. Hún fór í vetur námskeið í Le Cordon Bleu  í Lundúnum.

„Þetta er ein besta ákvörðun sem ég hef tekið held ég bara. Ég fór í nokkur skipti út og fór á sérstakt baksturs- og eftirrétta námskeið þar sem áherslan var lögð á tæknina á bakvið réttina. Ég naut hverrar mínútu og þetta var alveg geggjað, ég kann auðvitað  ýmislegt en hef aldrei lært tæknina á bakvið til dæmis af hverju maður býr til grunndeig fyrir bökur og af hverju svampbotnar eru svona og svona.. þannig ég lærð alveg helling sem mun nýtast mér. Svo var það bara frábært tækifæri að fara ein út, fara á veitingastaði, fá innblástur, horfa á fólk og einfaldlega njóta þess að vera til. Ég var skælbrosandi alla ferðina og hlakka til að fara aftur.“


Eva Laufey var að senda frá sér sína þriðju bók, Í eldhúsi Evu, og segir hún að það sé hægt að lýsa henni sem bókinni með notagildið.

„Ég lagði mig fram að velja uppskriftir sem hafa komið sér vel fyrir mig í gegnum árum, uppskriftir sem ég hef gert aftur og aftur. Það skiptir mig miklu máli að uppskriftirnar séu einfaldar og þokkalega auðveldar þannig að allir ættu að geta leikið þær eftir, sömuleiðis er mikilvægt fyrir mitt leyti að það uppskriftirnar séu þess eðlis að þú þurfir ekki þúsund krydd eða hráefni sem þú átt alla jafna ekki til. Aðgengilegar og þægilegar uppskriftir fyrst og fremst.“ Eva Laufey segir að þessi bók sé fyrir þá sem eru að taka sín fyrstu skref í eldhúsinu og fyrir þá sem eru lengra komnir.

„Uppskriftirnar eiga það sameiginlegt að vera einfaldar og því ættu allir, og ég meina allir að geta leikið þær eftir.“

Það eru sex ár frá því að fyrsta bókin hennar, Matargleði Evu kom út.

„Mér þykir einstaklega vænt um hana. Þar tók ég allar myndir sjálf og notaði svona bara það sem mér fannst vera fallegt á þeim tíma sem er líka ofsalega sætt í dag og það er gaman að fletta í gegnum hana og skoða hvað bæði uppskriftirnar mínar og myndir hafa þróast. Það er líka ferlega skemmtilegt að hún selst enn mjög vel og fólk er að nota hana mikið, bestu athugasemdirnar sem ég hef fengið er þegar fólk segir að hún sé mest notaða bókin í eldhúsinu – þá veit ég að hún er góð.


Bækurnar sjarmerandi

Kökubókin kom svo út fyrir þremur árum en ég er mikill sælkeri og veit fátt betra en góðar kökur, nýt þess að borða þær og þess vegna lá það beinast við að gera kökubók. Eins og með bók númer eitt þá var gríðarlega gaman að búa hana til og ég nota hana mikið. Í eldhúsi Evu hefur sama tilgang og hinar tvær, að innihalda uppskriftir fyrir alla og að bókin sé ekki upp á punt heldur gegni mikilvægu hlutverki í eldhúsinu. Hún er stærri en hinar tvær en fyrir mér eru þær allar jafn góðar og ég er svo montin af þeim.“

Hún segist alltaf vera með hugmynd af bók í maganum en nú hafi verið rétti tíminn.
„Ég hef starfað við það að búa til uppskriftir og vinna með mat undanfarin sex ár og á því svolítið gott safn sem mig langaði að deila með lesendum á öðrum vettvangi en í sjónvarpinu eða á blogginu. Þrátt fyrir miklar tæknibreytingar og að við getum nálgast uppskriftir mjög auðveldlega í gegnum símann þá finnst mér mikilvægt að búa til bækur, fallegar og góðar bækur sem eiga sinn stað í eldhúsinu. Það er enn svo mikill sjarmi sem fylgir bókum, sjarmi sem hverfur sennilega aldrei.“


 
 
 
View this post on Instagram
Ég þarf að halda útgáfuboð fljótlega og eðlilega máta ég eingöngu síðkjóla fyrir það tilefni! Má maður aðeins
A post shared by Eva Laufey Kjaran (@evalaufeykjaran) on

Allar myndirnar teknar á viku

Handritið var tilbúið fyrir löngu síðan en það þurfti að finna tíma fyrir myndatökurnar sem getur verið erfitt fyrir upptekna konu.

„Ég var hreinlega ekki viss hvort ég myndi ná því á þessu ári og var farin horfa á næsta ár en sem betur fer ákváðu útgefendurnir mínir að við skyldum halda okkur við planið og við keyrðum á myndatökur í einum grænum og við vorum viku að taka upp allar myndirnar en þetta eru yfir hundrað uppskriftir og þið getið rétt ímyndað ykkur stuðið í eldhúsinu og uppvaskið eftir því,“ segir Eva Laufey og hlær.

„En það var ótrúlega gaman þetta ferli og teymið í kringum bókina stórkostlegt, hefði aldrei geta þetta án þeirra.“
Eva Laufey segist alltaf vera að læra eitthvað nýtt, sérstaklega þegar hún fær tækifæri til þess að vinna með hæfileikaríku fólki.

„Eins og sagði þá var ég búin að skrifa handritið fyrir löngu en ég ákvað engu að síður að umbreyta því öllu og endurskrifaði þær nánast allar, eins og maður gerir, í tímaþröng. Kannski lærði ég bara að taka því aðeins rólega næst, í næstu bók.“

Eva er á fullu núna að kynna bókina og segir að það sé eitthvað skemmtilegasta sem hún fær að gera.

„Svo er ég auðvitað í Ísland í dag þar sem ég fæ tækifæri til þess að hitta fólk og núna fyrir jólin er ég svolítið að einbeita mér að jólamatnum og heimsæki sælkera. Einnig er ég að vinna að sjónvarpsþáttum sem fara í sýningu eftir áramót á Stöð 2 en þar fylgi ég einmitt bókinni minni eftir og fæ til mín góða gesti í eldhúsið. Svo er ég auðvitað bara að jólast eins og ég get og nýt þess í botn með fjölskyldunni minni.“
Eva Laufey deilir einni uppskrift með lesendum úr bókinni og má finna hana HÉR á Vísi. 


Tengdar fréttir

Uppskrift: Beef Wellington

Jólamaturinn minn í öllu sinni veldi. Dúnmjúk og safarík nautalund með sveppafyllingu, vafin í hráskinku og pökkuð inn í gómsætt smjördeig.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.