Innlent

Minnihlutinn vill kosningu um gróðurhvelfingarnar

Ari Brynjólfsson skrifar
Unnið hefur verið að undirbúningi þess að reisa gróðurhvelfingar við Stekkjarbakka.
Unnið hefur verið að undirbúningi þess að reisa gróðurhvelfingar við Stekkjarbakka. Fréttablaðið/Valli

Minnihlutinn í borgarstjórn Reykjavíkur vill að farið verði í íbúakosningu um deiliskipulag í útjaðri Elliðaárdalsins þar sem til stendur að reisa gróðurhvelfingar ALDIN Biodome.

Fram kemur í tillögu Sjálfstæðisflokksins, Miðflokksins, Sósíalistaflokks Íslands og Flokks fólksins, sem lögð verður fram á borgarstjórnarfundi á morgun, að atkvæðagreiðslan verði rafræn fyrir alla íbúa Reykjavíkur. Á sama fundi verður tekin fyrir umsögn skipulagsfulltrúa um deiliskipulagið sem samþykkt var á síðasta borgarráðsfundi.

Um er að ræða 4.500 fermetra niðurgrafnar gróðurhvelfingar þar sem verður fjölbreytt vistkerfi sem býður upp á nærandi upplifun, ræktunar- og verslunarrými, græna vinnuaðstöðu, aðstöðu fyrir jóga og fleira. Verkefnið kemur til með að kosta um 4,5 milljarða.

„Það var ekkert um það í stefnuskrá flokkanna sem buðu sig fram í síðustu kosningum að farið yrði í uppbyggingu á þessum stað. Þetta er þverpólitískt deilumál. Þarna er verið að ganga á grænu svæðin í borginni og við teljum að það eigi ekki að gera það nema spyrja íbúana fyrst,“ segir Eyþór Arnalds, oddviti Sjálfstæðisflokksins. „Við heyrum að það er fólk í ólíkum flokkum sem vill passa upp á grænu svæðin í borginni og Elliðaárdalurinn er það svæði sem er hvað minnst raskað og er hvað náttúrulegast.“

Ég nenni ekki að eltast við svona ódýr áróðurstrikk. Dóra Björt Guðjónsdóttir, oddviti Pírata

Sanna Magdalena Mörtudóttir, oddviti Sósíalista, tekur í sama streng. „Það er talað um að þetta eigi að vera græn uppbygging. Þarna er grænt svæði fyrir þannig að ég skil ekki hvers vegna það þurfi að heimila uppbyggingu á atvinnustarfsemi í svona fallegri náttúruperlu,“ segir Sanna. „Það er talað um að þetta eigi að vera í útjaðri Elliðaárdalsins, en þegar ég skoða myndir af þessu þá er þetta í Elliðaárdalnum í mínum huga.“

Dóra Björt Guðjónsdóttir, oddviti Pírata, er á öðru máli. „Ég hef byggt mína pólitík á því að almenningur geti komið sínum skoðunum á framfæri og er alltaf til í að skoða svona möguleika. Mér er hins vegar annt um að fara eftir kröfum sem raunverulega koma frá kjósendum og íbúum,“ segir Dóra Björt.

„Ég er orðin þreytt á því að minnihlutinn, þá sérstaklega Sjálfstæðisflokkurinn, sé að draga fram og misnota hugmyndir um íbúalýðræði þegar þeir vilja ekki einu sinni hlusta á niðurstöðu þjóðaratkvæðagreiðslu um nýja stjórnarskrá. Að draga fram svona hálfkákstillögur um íbúakosningu þegar það hentar þeim.“

Þarna er grænt svæði fyrir þannig að ég skil ekki hvers vegna það þurfi að heimila uppbyggingu á atvinnustarfsemi í svona fallegri náttúruperlu. Sanna Magdalena Mörtudóttir, oddviti Sósíalistaflokks Íslands

Borgarfulltrúar Sjálfstæðisflokksins hafa lagst harðlega gegn uppbyggingunni. „Ég er viss um það að kjósendur meirihlutaflokkanna, Vinstri grænna, Viðreisnar, Pírata og Samfylkingarinnar, séu margir hverjir sammála okkur um að láta þetta svæði í friði,“ segir Eyþór. „Það er undarlegt að farið sé að úthluta borgarlandi með þessum hætti án þess að það sé auglýst. Það eru margir gallar í þessu, þarna er verið að afhenda gæði borgarinnar án auglýsingar. Síðan liggur ekki fyrir hvernig á að fjármagna þetta eða hvernig rekstur þarna á að ganga upp, þannig að það getur eitthvað allt annað endað þarna.“

Kolbrún Baldursdóttir, oddviti Flokks fólksins, segir miklar tilfinningar tengdar Elliðaárdalnum. „Það er aldrei farsælt að fara í svona verkefni nema með samþykki íbúa,“ segir Kolbrún. „Ég man eftir því þegar ég var í hópnum Betra Breiðholt, þá kom upp umræða um að hafa slökkviliðið á þessum stað. Þá voru mjög harkaleg viðbrögð.“

Dóra Björt segir tillöguna ekki standast formkröfur. „Þau eru svo mikið að drífa sig í að koma innihaldinu í einhverjar Facebook-færslur. Ég nenni ekki að eltast við svona ódýr áróðurstrikk.“ 


Tengdar fréttir

Verulega hugsi yfir seinagangi kerfisins

Frumkvöðull að baki fyrirhugaðri byggingu ALDIN Biodome við Stekkjarbakka segist hugsi yfir þeim tíma sem ferlið hefur tekið hjá borginni. Hvorki hafi verið gerðar alvarlegar athugasemdir við ferlið né samræmi við skipulag.

Eðlilegt að kosið verði um Elliðaárdalinn

Meiri­hluti borg­ar­ráðs Reykja­vík­ur samþykkti nýtt deili­skipu­lag fyr­ir Stekkj­ar­bakka, í nágrenni Elliðaárdalsins, á fundi sín­um í gær. Málið er mjög umdeilt og fundaði borgarráð tveimur tímum lengur í gær en gert var ráð fyrir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.