Erlent

Hermennirnir hafa mánuð til að fara frá Írak

Samúel Karl Ólason skrifar
Mark Esper, varnarmálaráðherra Bandaríkjanna, og Najah al-Shammari, varnarmálaráðherra Írak,
Mark Esper, varnarmálaráðherra Bandaríkjanna, og Najah al-Shammari, varnarmálaráðherra Írak, AP/Hadi Mizban

Yfirvöld Írak segja að bandarísku hermennirnir sem eru komnir til Írak frá Sýrlandi verði að yfirgefa landið innan fjögurra mánaða. Þetta sagði Najah al-Shammari, varnarmálaráðherra Írak, eftir að hann fundaði með Mark Esper, varnarmálaráðherra Bandaríkjanna, í dag.

Esper hafði sagt að mögulega yrðu hermennirnir áfram í Írak og héldu baráttunni gegn Íslamska ríkinu áfram þaðan. Svo virðist þó ekki vera.

Donald Trump, forseti Bandaríkjanna, tók þá ákvörðun að kalla hermenn Bandaríkjanna frá Sýrlandi og gerði þar með Tyrkjum kleift að herja á sýrlenska Kúrda, bandamenn Bandaríkjanna gegn Íslamska ríkinu. Forsetinn hefur haldið því fram að mennirnir myndu fara til Bandaríkjanna. Nú stendur til að skilja einhverja hermenn eftir í Sýrlandi og er hinum, um þúsund, ætlað að fara til Írak.

Nú eru um fimm þúsund bandarískir hermenn í Írak. Þeir voru kallaðir heim árið 2011 og sneru aftur árið 2014, þegar vígamenn ISIS lögðu stóran hluta Írak og sömuleiðis Sýrlands undir sig.

Eftir að ríkisstjórn Írak lýsti yfir sigri gegn ISIS árið 2017 hafa áköll eftir brottför hermanna Bandaríkjanna orðið sífellt háværari.

Rússneskir hermenn eru nú að taka sér stöðu á landamærum Tyrklands og Sýrlands, í stað bandarísku hermannanna.

Recep Tayyip Erdogan, forseti Tyrklands, og Vladimir Pútín, forseti Rússlands, komust í gær að samkomulagi um að sýrlenskir Kúrdar myndu yfirgefa svæðið við landamæri ríkjanna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.