Innlent

Maxarnir tóku stóran sveig framhjá loftrýmum Bretlands og Frakklands

Kristján Már Unnarsson skrifar
Horft út um glugga MAX-vélarinnar Búlandstinds, TF-ICO, í ferjufluginu í gær. Glöggir flugáhugamenn greina að flapsar framan á vængnum eru úti.
Horft út um glugga MAX-vélarinnar Búlandstinds, TF-ICO, í ferjufluginu í gær. Glöggir flugáhugamenn greina að flapsar framan á vængnum eru úti. Mynd/Áhöfn TF-ICO.

Boeing MAX-þoturnar tvær frá Icelandair, sem ferjaðar voru milli Íslands og Spánar í gær, fóru ekki stystu leið milli áfangastaðanna heldur tóku stóran sveig út á Atlantshaf á leggnum milli Írlands og Spánar. 

Flugleið MAX-véla Icelandair í gær. Mynd/Af Flightradar24

Flugsíðan Simple Flying, sem fylgdist með fluginu, sagði að svo virtist sem vélarnar væru að forðast loftrými Bretlands og Frakklands. Það voru þó einungis frönsk flugmálayfirvöld sem ekki leyfðu yfirflug. 

Ferjuflugið til Katalóníu gekk að óskum og lenti fyrri vélin um fimmleytið síðdegis en sú seinni klukkan rúmlega sjö í gærkvöldi. Búist er við að Icelandair ferji næstu MAX-vél um miðja næstu viku. 

„Þetta gekk allt eins og til var ætlast, og engar bilanir og ekkert óvænt sem kom upp á,“ sagði Þórarinn Hjálmarsson flugstjóri og flotastjóri MAX-véla Icelandair, í samtali við Vísi í dag, en vélarnar flugu inn yfir meginlandið á norðvesturhorni Spánar. 

Icelandair hafði upphaflega valið Toulouse í Suður-Frakklandi sem vetrargeymslu fyrir MAX-vélarnar. Til stóð að hefja ferjuflugið í síðustu viku og var fyrsta flug ráðgert þriðjudaginn 1. október. Daginn áður töldu Icelandair-menn sig vera komna með grænt ljós á flugið þegar kom krafa frá Frökkum um að þotunum yrði ekki flogið yfir þéttbýlissvæði. 

Flugstjórarnir Þórarinn Hjálmarsson og Guðjón S. Guðmundsson flugu Mývatni, TF-ICN, í gær. Vísir/kmu

Þegar flugstjórinn Þórarinn Hjálmarsson var spurður fyrir brottför í gærmorgun hversvegna hætt hefði verið við Frakkland svaraði hann: 

„Það er bara út af leyfismálum og öðru slíku. Það eru kannski ekkert allir sem vilja fá vélarnar inn til sín og Frakkarnir eru þar á meðal. Kannski er það bara út af Airbus, - ég veit það ekki,“ sagði Þórarinn í fréttum Stöðvar 2, en höfuðstöðvar Airbus eru einmitt í borginni Toulouse. 

Sjá frétt Stöðvar 2: MAX-vél Icelandair flýgur í fyrsta sinn frá því í mars

Flugstjórarnir Kári Kárason og Franz Ploder flugu Búlandstindi, TF-ICO.

Flug MAX-vélanna sætti fleiri takmörkunum. Aðeins reyndustu flugstjórar máttu fljúga þeim og einungis tveir um borð. Þá þurftu vélarnar að fljúga með vængbörð úti, á fyrsta þrepi. Þetta takmarkaði flughæð við 20.000 fet og flughraða við 240 hnúta, eða um 450 kílómetra hraða á klukkustund, sem þýddi meiri eldsneytiseyðslu og kallaði á millilendingu á Shannon-flugvelli á Írlandi. 

Flugsíðan Simple Flying sagði báðar MAX-vélarnar í gær hafa flogið í 19.000 feta hæð og verið á um 270 hnúta hraða, eða 310 mílna hraða á klukkustund. Undir eðlilegum kringumstæðum flygju þessar þotur í 35.000 feta hæð og á flughraða í kringum 450 hnúta.

MAX-þotan Mývatn í flugtaksbruninu á Keflavíkurflugvelli í gærmorgun. Vísir/KMU.

Flugvélarnar sem ferjaðar voru í gær, TF-ICN Mývatn og TF-ICO Búlandstindur, voru báðar að fara í sitt fyrsta flug eftir að Icelandair hafði fengið þær frá Boeing-verksmiðjunum í vor og flogið þeim til Íslands. Hvorug vélin hefur flogið með farþega. Þær voru kyrrsettar þann 12. mars, fyrir sléttum sjö mánuðum. 

Fjórir þjálfunarflugstjórar Icelandair fljúga öllum vélunum, þeir Þórarinn Hjálmarsson, Guðjón S. Guðmundsson, Kári Kárason og Franz Ploder. 

Hér má sjá frétt Stöðvar 2 í gærkvöldi um flug MAX-vélanna með viðtali við flugstjórann:


Tengdar fréttir

Maxarnir náðu án vandræða til vetrarstöðvanna á Spáni

Tveimur Boeing 737 MAX-vélum Icelandair var flogið frá Íslandi í dag til vetrargeymslu á Spáni. Þetta var í fyrsta sinn frá kyrrsetningu MAX-vélanna fyrir sjö mánuðum að vélar þessarar tegundar frá Icelandair tóku á loft.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.