Innlent

Sjúkra­bílar kallaðir út frá fimm stöðum vegna slyssins

Sylvía Hall skrifar
Fjöldi viðbragðsaðila var kallaður út þegar tilkynning barst um slys á Snæfellsvegi í dag.
Fjöldi viðbragðsaðila var kallaður út þegar tilkynning barst um slys á Snæfellsvegi í dag. Vísir/LHG

Fimm slösuðust og þar af tveir alvarlega þegar bíll erlendra ferðamanna fór út af Snæfellsvegi nærri bænum Gröf við Kleifá á sunnanverðu Snæfellsnesi í dag. Björgunaraðgerðir voru umfangsmiklar en sjúkrabílar frá fimm stöðum voru kallaðir út.

Að sögn Gísla Björnssonar, yfirmanns sjúkraflutninga á Vesturlandi, var ljóst þegar tilkynnt var um slysið að um alvarlegt slys væri að ræða þar sem hinir slösuðu voru fastir undir bílnum. Sjúkrabílar frá Akranesi, Borgarnesi, Grundarfirði, Ólafsvík og Stykkishólmi voru kallaðir út og í kjölfarið var óskað eftir aðstoð Landhelgisgæslunnar.

Slökkviliðið í Stykkishólmi og Borgarnesi var kallað út með tækjabíla til þess að aðstoða við að ná fólkinu en bíllinn er talinn hafa farið nokkrar veltur við slysið. Ekki er vitað um líðan hinna slösuðu sem stendur.

Fjórir sjúkraflutningamenn frá Reykjavík fóru með þyrlum Landhelgisgæslunnar á vettvang og voru fjórir fluttir á sjúkrahús í Reykjavík með flugi, þar af tveir alvarlega slasaðir, og lenti fyrri þyrlan á Landspítalanum í Fossvogi um 14:40 í dag og sú seinni tíu mínútum síðar. Sá fimmti var fluttur á sjúkrahús með sjúkrabíl.

Frá vettvangi í dag. Vísir/LHG

Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.