Lífið kynningar

Hjálpaðu Landgræðslunni og þú gætir unnið fjölskylduferð í Húsafell

Landgræðslan, Olís og Hekluskógar kynna
Heppinn fræsafnari vinnur fjölskylduferð fyrir fjóra á Hótel Húsafell.
Heppinn fræsafnari vinnur fjölskylduferð fyrir fjóra á Hótel Húsafell.

Landgræðslan, Olís og Hekluskógar standa nú fyrir landssöfnun á birkifræjum til að græða upp birkiskóga og auka kolefnisbindingu. Landsmenn eru hvattir til að fara út og tína birkifræ og skila þeim inn á Olísstöðvar. Til mikils er að vinna, en einn heppinn fræsafnari vinnur fjölskylduferð fyrir fjóra á Hótel Húsafell, með gistingu, þriggja rétta máltíð, morgunverði og aðgangi að sundlaug. Allar upplýsingar um átakið er að finna á olis.is/birkifrae.

Uppgræðsla innlendra tegunda eins og birkiskóga og víðikjarrs eru ein mikilvirkasta aðferðin sem við höfum til kolefnisbindingar. Við landnám er talið að birkiskógar hafi þakið um 25–30% landsins en nú þekja þeir aðeins um 1,5%. Árið 2019 var ekki gott fræár og söfnunin er liður í að hjálpa náttúrunni að hjálpa sér sjálfri. Fræið sem safnast verður gróðursett vorið 2020.

Hægt er að nálgast fræsöfnunarbréfpoka á völdum Olís-stöðvum víðsvegar um land en þá þarf síðan að merkja með nafni og símanúmeri þess sem tíndi og upplýsingum um hvar fræið var tínt, og skila aftur á áðurnefndar Olísstöðvar. Þeir sem ekki eiga þess kost að safna fræinu í umrædda pappírspoka eru beðnir að nota taupoka og skila þeim merktum á Olísstöðvar. Best er að koma pokunum sem fyrst á söfnunarstaði. Átakinu lýkur um miðjan október og þá verður dregið úr nöfnum þeirra sem söfnuðu.

Söfnun birkifræs er góð ástæða til að komast út og njóta fallegra haustdaga. Auk þess er fræsöfnun prýðileg fjölskylduskemmtun og er full ástæða til að hvetja vinnustaði og vinahópa til að fara í fræsöfnunarferðir.

Hvernig söfnum við birkifræi?

Hægt er að safna birkifræi frá lokum ágúst og fram í byrjun október, eða svo lengi sem reklar eru á trjánum. Safnarar þurfa að velja falleg tré til að safna af en talið er að vaxtarlag trjánna og hugsanlega vaxtarþróttur þeirra erfist. Fræplöntur af fallegum og kröftugum trjám eru því líklegri til að vaxa hraðar í æsku.

Þægilegast er að safna fræinu þegar birki hefur fellt lauf enda má þá strjúka það af greinunum með lítilli fyrirhöfn. Ef safna á fræi mjög seint er hætt við að hauststormar hafi verið fyrri til og feykt fræinu af trjánum. Best er að safna á þurrum sólríkum haustdögum þegar lauf er að mestu fallið af trjánum, en fræin sitja eftir.

Margir skógar henta ágætlega fyrir fræsöfnun, sér í lagi ungskógar, þar sem trén eru í hæfilegri hæð, 2–3, m og auðvelt er að komast um. Heimagarðar og bæjargarðar henta einnig vel enda eru tré á slíkum svæðum oft greinamikil og standa gisið. Fræsöfnun er ákaflega skemmtileg viðbót við sunnudagsgöngu og góð ástæða til að njóta haustlita í skjóli birkiskóga.

Á olis.is/birkifrae má sjá fræðslumyndband um tínslu á birkifræi og allar nánari upplýsingar.


Uppfært 15. október. Leiknum er lokið. 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.