Erlent

Johnson sagður hóta hreinsunum í eigin flokki

Kjartan Kjartansson skrifar
Philip Hammond, fyrrverandi fjármálaráðherra, á meðal andstæðinga útgöngu án samnings í Íhaldsflokki Johnson.
Philip Hammond, fyrrverandi fjármálaráðherra, á meðal andstæðinga útgöngu án samnings í Íhaldsflokki Johnson. Vísir/EPA
Þingmönnum Íhaldsflokksins sem greiða atkvæði gegn ríkisstjórn Boris Johnson, forsætisráðherra, verður sparkað úr þingflokknum og bannað að bjóða sig fram í næstu kosningum. Þessu er Johnson sagður hafa hótað samflokksmönnum sínum í aðdraganda viðburðaríkrar viku á þingi.



Búist er við því að stjórnarandstöðuflokkarnir leggi fram fjölda frumvarpa til að reyna að koma í veg fyrir að Johnson dragi Bretland út úr Evrópusambandinu án samnings í lok næsta mánaðar. Eins er mögulegt að Jeremy Corbyn, leiðtogi Verkamannaflokksins, leggi fram vantrauststillögu á hendur Johnson.



Reuters-fréttastofan segir að Johnson hafi hótað eigin þingmönnum hreinsunum fylgi þeir ekki flokkslínunni í atkvæðagreiðslum í vikunni. Þingmönnunum sé sagt að greiði þeir atkvæði gegn Johnson skaði þeir samningsstöðu ríkisstjórnarinnar gagnvart Evrópusambandinu og færi Corbyn völdin á þingi í hendur.



Staða Íhaldsflokksins á þingi er tæp. Yrði efasemdamönnum um Brexit án samnings eins og Philip Hammond, fyrrverandi fjármálaráðherra, eða David Gauke, fyrrverandi dómsmálaráðherra, sparkað úr flokknum yrði að boða til kosninga.


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.