Handbolti

Oddur með fimm í stórsigri | Elvar frábær þegar Stuttgart fékk sitt fyrsta stig

Oddur og félagar rúlluðu yfir Melsungen.
Oddur og félagar rúlluðu yfir Melsungen. vísir/getty
Oddur Gretarsson skoraði fimm mörk þegar nýliðar Balingen-Weilstetten unnu óvæntan stórsigur á Melsungen, 36-23, í þýsku úrvalsdeildinni í handbolta í dag. Fjögur af mörkum Odds komu af vítalínunni.

Balingen hefur unnið tvo af fyrstu fjórum leikjum sínum á tímabilinu.

Elvar Ásgeirsson átti frábæran leik þegar Stuttgart gerði jafntefli við Minden, 24-24. Mosfellingurinn skoraði sex mörk úr sex skotum og gaf þrjár stoðsendingar.

Þetta var fyrsta stig Stuttgart á tímabilinu en liðið er í 16. sæti.

Arnór Þór Gunnarsson skoraði fimm mörk þegar Bergischer lagði Wetzlar að velli, 33-30. Þrjú marka hans komu af vítalínunni.

Ragnar Jóhannsson var ekki á meðal markaskorara hjá Bergischer sem er í 6. sæti deildarinnar.

Bjarki Már Elísson skoraði sjö mörk, þar af þrjú úr vítum, þegar Lemgo steinlá fyrir Hannover-Burgdorf, 26-36, á heimavelli.

Lemgo hefur tapað þremur leikjum í röð og er í 15. sæti deildarinnar.




Fleiri fréttir

Sjá meira


×