Innlent

Freista þess að nota ferlaufung til að hindra vegagerð um Teigsskóg

Kristján Már Unnarsson skrifar
Hér sést veglínan um Teigsskóg í vestanverðum Þorskafirði.
Hér sést veglínan um Teigsskóg í vestanverðum Þorskafirði. Grafík/Vegagerðin.

Alfriðuð blómplanta, sem kallast ferlaufungur, hefur fundist í veglínu Teigsskógar og því bannað að skerða hana á nokkurn hátt, að mati landeigenda.

Þetta er meðal þess sem fram kemur í athugasemdum vegna lagningar Vestfjarðavegar um skóginn. Vegagerðin vonast engu að síður til að geta boðið verkið út upp úr áramótum. Þetta kom fram í fréttum Stöðvar 2.

Úr Teigsskógi. Vísir/Egill.

Það var í ársbyrjun sem hreppsnefnd Reykhólahrepps samþykkti að leiðin um Teigsskóg færi inn á aðalskipulag en frestur til að gera athugasemdir rann nýlega út. Hartnær fimmtíu bárust. 

Það kemur ekki  á óvart að Landvernd er í hópnum sem er á móti, vill frekar jarðgöng, og sama sinnis er Náttúrufræðistofnun. 

Vesturbyggð telur á hinn bóginn þetta afar brýna samgöngubót og Samgöngufélagið segir framkvæmdina sömuleiðis mikilvæga og ekki þola bið ef byggð á sunnanverðum Vestfjörðum eigi ekki að bíða hnekki.

Gunnlaugur Pétursson er talsmaður sumarbústaðaeigenda sem berjast gegn vegagerð um Teigsskóg. Stöð 2/Egill Aðalsteinsson.

Helsti baráttumaður gegn Teigsskógarvegi, Gunnlaugur Pétursson, sem talar fyrir hönd sumarhúsaeigenda, birtir ljósmynd í sinni athugasemd af plöntu sem fundist hafi í vegstæðinu og kallast ferlaufungur. Hún sé alfriðuð, á válista og því bannað að skerða búsvæði hennar.

Ferlaufungur. Latneska heiti jurtarinnar er Paris quadrifolia. Ber hennar er eitrað. Mynd/Wikimedia.

Athygli vekur að Umhverfisstofnun telur jákvætt að lega Vestfjarðavegar sé sýnd þannig að hún liggur ekki um Teigsskóg um brekkur og fjörur, heldur virðist vera nánast alfarið ofan við fjöruborð og neðan við brekkur. 

Að því gefnu að athugasemdir reynist ekki hindrun má telja líklega framvindu málsins að Vegagerðin geti sótt um framkvæmdaleyfi til sveitarstjórnar í nóvember. Telja má víst að útgáfa þess verði kærð og málið fari til Úrskurðarnefndar umhverfis- og auðlindamála.

Fundarstaðir ferlaufungs á Íslandi, samkvæmt útbreiðslukorti Náttúrufræðistofnunar Íslands. Kort/Náttúrufræðistofnun Íslands, Hörður Kristinsson.

Hjá Vegagerðinni vonast Magnús Valur Jóhannsson, framkvæmdastjóri mannvirkjasviðs, samt til að unnt verði að bjóða verkið út fljótlega eftir áramót. 

Sú von byggir þó á því að kærumál falli með Vegagerðinni og jafnframt að eignarnámsferli gagnvart andsnúnum landeigendum, sem virðist blasa við í framhaldinu, leiði ekki til enn frekari tafa eða jafnvel stöðvunar. 

Hér má sjá frétt Stöðvar 2: 


Tengdar fréttir

Reykhólahreppur auglýsir veglínu um Teigsskóg

Reykhólahreppur hefur auglýst aðalskipulagsbreytingu vegna legu Vestfjarðavegar um Gufudalssveit. Auglýsingin er birt fimm mánuðum eftir að hreppsnefnd samþykkti að velja Teigsskógarleiðina.

Reykhólahreppur valdi ÞH-leið um Teigsskóg

Hreppsnefnd Reykhólahrepps samþykkti á fundi sem lauk nú á þriðja tímanum að setja veglínu um Teigsskóg inn á aðalskipulag sveitarfélagsins. Það var samþykkt með þremur atkvæðum gegn tveimur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.