Innlent

Hyggst leggja fram til­lögu um nýjan dóms­mála­ráð­herra áður en þingið hefst að nýju

Sylvía Hall skrifar
Bjarni Benediktsson, formaður Sjálfstæðisflokksins og fjármálaráðherra.
Bjarni Benediktsson, formaður Sjálfstæðisflokksins og fjármálaráðherra. Vísir/vilhelm

Þórdís Kolbrún Reykfjörð Gylfadóttir mun ólíklega halda áfram að gegna stöðu dómsmálaráðherra á komandi þingári. Þetta kom fram í viðtali við Bjarna Benediktsson í Kastljósi í kvöld þar sem hann sagðist ætla leggja fram tillögu um nýjan dómsmálaráðherra áður en þingið hefst aftur í september.

Bjarni sagðist upphaflega ætlað að klára málið fyrr í sumar en að lokum ákveðið að taka sér lengri tíma og vanda ákvarðanatökuna vel í samráði við aðra innan flokksins. 

„Ég hef einfaldlega ákveðið að gefa mér þann tíma sem þessar aðstæður hafa kallað á og hlustað á flokksmenn, og ekki síður þingflokkinn,“ sagði Bjarni. Hann segir Þórdísi Kolbrúnu þekkja vel til þeirra verka sem eru á borði dómsmálaráðuneytisins en hún sinni ráðuneyti sem hún hafi mikinn áhuga á og muni að öllum líkindum halda áfram að sinna starfi sínu sem ferðamála-, iðnaðar- og nýsköpunarráðherra.

Aðspurður hvort það kæmi til greina að Sigríður Andersen myndi snúa aftur í ríkisstjórn svaraði Bjarni játandi. Hún nyti bæði trausts innan þingflokksins og á meðal flokksmanna, væri reynslumikill ráðherra og einn af öflugustu stjórnmálamönnum landsins. 

Þingmenn Sjálfstæðisflokksins hafa sætt mikilli gagnrýni frá óánægðum flokksmönnum vegna orkupakkamálsins. vísir/vilhelm

Lítur ekki á umræðuna sem persónulega árás á sig

Mikið hefur verið fjallað um klofning innan Sjálfstæðisflokksins vegna þriðja orkupakkans. Segja sumir að um sé að ræða átök milli íhaldssamari væng flokksins og þess frjálslyndari. Þá hafa margir áhrifamenn innan flokksins gagnrýnt hann opinberlega, og jafnvel sagt sig úr honum.

Sjá einnig: Gamlir foringjar pönkast í forystunni 

Í viðtalinu sagði Bjarni það koma sér á óvart hve hátt umræðan um orkupakkann hafi farið á undanförnum mánuðum. Málið hafi lengi verið á borði Alþingis og verið til umræðu í fyrri ríkisstjórn. Það hafi fengið ítarlega og vandaða afgreiðslu og hann sæi því ekki efnislega ástæðu til þess að vísa því aftur til sameiginlegu EES-nefndarinnar, slíkt væri fordæmalaust.

„Ég skynja það að mörgum er mjög mikið niðri fyrir og þegar ég hlusta á það sem menn eru að hafa helst áhyggjur af þá segi ég við sjálfan mig: Ég er alveg sammála þessu fólki um mikilvægi orkustefnu fyrir landið, að við getum nýtt orkuna fyrir framfarir í landinu fyrir landsmenn alla, að það skiptir máli að við gefum ekki frá okkur yfirráð í þessum mála flokki og við erum ekki að gera það í þessu tiltekna máli,“ sagði Bjarni og kallaði jafnframt eftir dýpri og skarpari umræðu í þessum málaflokki.

Hann gaf lítið fyrir allt tal um klofning innan flokksins, málið væri vissulega umdeilt og slíkt væri skiljanlegt í stórum og breiðum flokki. Flokkurinn væri opinn fyrir umræðum og skoðanaskiptum og þau sjónarmið hefðu verið virt.

Hann sagði flokkinn rætt við fólk innan flokksins um þeirra áhyggjuefni og átt í góðu sambandi við flokksmenn, sem sýndi sig hvað best í fjölda opinna funda sem Bjarni sagði vera í kringum sjötíu. Flokkurinn hefði því augljóslega ekkert að fela hvað varðar orkupakkann.


Tengdar fréttir

Gunnar Bragi vonar að almennir flokksmenn Sjálfstæðisflokksins komi viti fyrir forystuna

Varaformaður Miðflokksins segir að vissulega hafi hann undirbúið innleiðingu þriðja orkupakkans í lög ráðherratíð sinni eins honum bar að gera. Hann hafi hins vegar ekki verið í ríkisstjórn þegar ákveðið var að leita ekki eftir undanþágu frá innleiðingunni. Hann vonar að flokksmenn stjórnarflokkanna komi viti fyrir forystuna í þessu máli.

Gamlir leiðtogar Sjálfstæðisflokks standa með Framsókn

Framsóknarflokkurinn hefur átt sviðið í aðdraganda sveitarstjórnarkosninga. Vaxandi gremja er meðal sjálfstæðismanna með stöðuna og þróun mála, en fyrrverandi forystumenn flokksins í borgarstjórn gagnrýna nú félaga sína og taka upp hanskann fyrir Framsókn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.