Erlent

Listunnandi í hjólastól afar ósáttur með listaverk Ólafs Elíassonar og lét hann heyra það

Tryggvi Páll Tryggvason skrifar
Ciara O'Connor var ósátt við að komast ekki inn í listaverk Ólafs og sagði það lýsandi fyrir lífið í hjólastól.
Ciara O'Connor var ósátt við að komast ekki inn í listaverk Ólafs og sagði það lýsandi fyrir lífið í hjólastól. Mynd/Getty/Ciara O'Connor

Ciara O'Connor, írskur pistlahöfundur sem nota þarf hjólastól, var vægast sagt ósátt með Ólaf Elíasson og listaverk hans sem nú er til sýnis í Tate Modern safninu í London eftir heimsókn þangað á föstudaginn.

Gagnrýnir hún Ólaf og forsvarsmenn safnsins fyrir að hafa ekki hugsað út í þarfir þeirra sem eru í hjólastól við uppsetningu á listaverkinu Your Spiral View, auk þess sem að hún er ósátt við texta sem fylgir innsetningu Ólafs.

Fjallað er um málið á vef The Art Newspaper og vitnað í röð tísta sem O'Connor birti eftir heimsóknina. Af lestri þeirra má sjá að hún var afar ósátt við Ólaf og forsvarsmenn safnsins. Beinist reiðin einkum að listaverkinu Your Spiral View, átta metra löngum göngum úr stáli. Hugmyndin er að gestir safnsins gangi í gegnum göngin og spegli sig í stálplötunum. Stíga þarf upp tvær tröppur til að komast að göngunum.

Lýsir O'Connor því hvernig vinkona hennar hafi spurt safnvörð hvort hægt væri að útvega ramp, svo O'Connor gæti fengið að fara í gegnum göngin. Það var hins vegar ekki mögulegt og sagði safnvörðurinn að hún gæti rúllað sér við hliðina á göngunum.

Tíst O'Connor um málið hafa vakið talsverða athygli og meðal annars svaraði Ólafur henni á Twitter vegna málsins.



Í frétt The Art Newspaper segir hins vegar að eftir ítarlega skoðun hafi það verið niðurstaðan að ekki væri hægt að gera listaverkið sem um ræðir aðgengilegt fyrir hjólastóla á öruggan hátt. Jafn vel þótt rampi væri bætt við væri gangurinn of þröngur fyrir hjólastóla.

Þetta var þó ekki það eina sem O'Connor gerði athugasemd við í tengslum við sýningu Ólafs en í texta sem fylgir innsetningunni má lesa orð hans um að í listasöfnum færist fólk um líkt og það sé án líkama. Við þetta var O'Connor allt annað en sátt.

„Veistu hvað? Til fjandans með það, til fjandans með þig fyrir gáfumannatal og stór orð sem fela þá staðreynd að þú býrð aðeins til, framleiðir og sýnir listaverk fyrir ákveðna líkama. Til fjandans með þig fyrir að gera ráð fyrir því að allir sem kunni að meta list og listasöfn geti „hreyft sig líkt og þeir hafi ekki líkama.“,“ skrifar O'Connor á Twitter.


Þessi orð svíði vegna þessa hún sjálf fái aldrei að vera ómeðvituð um líkama sinn, hvernig hann, í hjólastólnum, sé fyrir fólki, taki mikið pláss og sé fyrirferðarmikill. Þegar hún heimsæki listasöfn fari mestur tími í að afsaka sig fyrir að vera á staðnum.

Þá beinir hún orðum sínum að safnverðinum sem sagði henni að fara í kringum listaverkið.

„Farðu til fjandans vinur. Það er saga lífs míns og allra þeirra sem eru í hjólastól. Fara í kringum hluti, horfa á fyrir utan. Horfa á annað fólk njóta lífsins, listaverka, samgangna og hver sem er á þann hátt sem á að njóta þess.“

Tíst O'Connor má lesa hér og myndband sem sýnir listaverkið sem um ræðir má sjá hér að neðan.


Tengdar fréttir

Ólafur lýsir upp Sigurbogann

Listamaðurinn Ólafur Elíasson hefur verið fenginn til þess að útbúa listaverk sem lýsir upp Sigurbogann í höfuðborg Frakklands, París. Stefnt er að því að verkið verði sett upp árið 2020.

Sjáðu Ólaf Elíasson breika

Listamaðurinn Ólafur Elíasson breikdansar, nakið raunveruleikasjónvarp, Game of Thrones og fleira er rætt að sinni í 101 Fréttum. Logi Pedro fer yfir það helsta sem gerðist í vikunni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.