Formúla 1

Uppgör: Frábær taktík hjá Mercedes

Bragi Þórðarson skrifar
Ákvörðunin Mercedes að láta Hamilton stoppa tvisvar tryggði þeim sigurinn um helgina.
Ákvörðunin Mercedes að láta Hamilton stoppa tvisvar tryggði þeim sigurinn um helgina. Getty

Lewis Hamilton stóð uppi sem sigurvegari í ungverska kappakstrinum um helgina. Það voru liðsmenn Mercedes sem eiga mestan heiðurinn skilið eftir frábæra taktík í keppninni.

Með sigrinum hefur Hamilton aukið forskot sitt í 62 stig á toppi heimsmeistaramóts ökumanna. Annar kemur liðsfélagi hans, Valtteri Bottas, og þriðji í mótinu kemur Max Verstappen.

Verstappen kom annar í mark eftir að hafa leitt keppnina alla hringina nema síðustu þrjá. Á 67. hring af 70 tók Hamilton framúr Hollendingnum.

„Þessi dekk eru ónýt,“ sagði Max í talstöðinni rétt áður en Lewis komst framúr.
 

James Vowles, aðaltæknimaður Mercedes, fagnaði vel með Lewis Hamilton á verðlaunapallinum. Getty

Keppni þar sem taktík skipti öllu máli

Red Bull kölluðu Max inn á þjónustusvæðið á 25. hring og settu hörðu dekkin undir. Sex hringjum síðar kom Hamilton úr öðru sætinu inn og fékk hörðu dekkin eins og Verstappen.

Bretinn fór í mikla árás á næstu hringjum en komst ekki framúr Max enda varðist Hollendingurinn meistaralega.

Þegar að 21 hringur var eftir tók Mercedes liðið þá ákvörðun að kalla Hamilton aftur inná þjónustusvæðið. Þá settu þeir glæný meðalmjúk dekk undir en bilið í Verstappen var þá orðið 18 sekúndur.

Fimmfaldi heimsmeistarinn keyrði eins og heimsmeistara sæmir það sem eftir var keppninnar og át upp forskot Verstappen. Loks komst Hamilton framúr þegar aðeins þrír hringir voru eftir.
 

Max Verstappen leiddi 67 hringi af 70 en það dugði ekki til sigurs. Getty

Hamilton kominn í kjörstöðu

Sigurinn varð hans sjöundi á Hungaroring brautinni og er Bretinn nú búinn að auka forskot sitt í 62 stig í mótinu.

Valtteri Bottas, liðsfélagi Hamilton hjá Mercedes, gekk hræðilega um helgina. Á fyrsta hring lenti hann í samstuði við Ferrari bíl Charles Leclerc sem varð til þess að framvængur Bottas brotnaði. Eftir að hafa dottið niður í neðsta sæti vann Finninn sig að lokum upp í það áttunda.

Úrslitin þýða að Max Verstappen er nú aðeins sjö stigum á eftir Bottas í keppni ökuþóra en Ferrari ökumennirnir koma þar á eftir.

Ekkert gekk hjá Ferrari um helgina. Vissulega náði Sebastian Vettel þriðja sætinu en Þjóðverjinn kom í mark rúmri mínútu á eftir fyrsta sætinu.

Ferrari er þó enn í öðru sæti í keppni bílasmiða, 44 stigum á undan Red Bull. Slakt gengi Pierre Gasly hefur sett stórt strik í reikninginn hjá orkudrykkjaframleiðandanum.

Nú fer Formúlan í mánaðar sumarfrí, næsta keppni fer fram á sögufrægu Spa brautinni í Belgíu um næstu mánaðarmót.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.