Formúla 1

Verstappen vann magnaðan sigur í Austurríki

Bragi Þórðarson skrifar
Fjöldinn allur af Hollendingum lögðu leið sína til Austurríkis til að styðja við sinn mann, Max Verstappen.
Fjöldinn allur af Hollendingum lögðu leið sína til Austurríkis til að styðja við sinn mann, Max Verstappen. Vísir/Getty

Níunda umferðin í Formúlu 1 fór fram á Red Bull brautinni í Austurríki um helgina. Mercedes hefur verið alls ráðandi þetta tímabil en sigurgöngu liðsins lauk um helgina.

Ríkjandi heimsmeistarinn, Lewis Hamilton, náði næstbesta tíma í tímatökum en fékk refsingu fyrir að hindra annan bíl. Fyrir vikið byrjaði hann fjórði á eftir liðsfélaga sínum Valtteri Bottas.

Á fremstu röð voru Charles Leclerc á Ferrari og Max Verstappen á Red Bull. Báðir eru þeir aðeins 21 árs, aldrei í sögu Formúlu 1 hefur meðalaldurinn á fremstu röð verið jafn lár.

Mikil pressa var á Verstappen, liðið var á heimavelli og nánast allir áhorfendur voru hollendingar klæddir appelsínugulu að styðja Max.

Hræðileg byrjun Verstappen

Mikil spenna var í upphafi kappakstursins í hitanum í Austurríki. Getty

Keppnin byrjaði hræðilega fyrir Hollendinginn er hann tapaði sjö sætum strax í ræsingu og var dottinn niður fyrir liðsfélaga sinn, Pierre Gasly.

Verstappen vann sig þó jafnt og þétt upp listann og á 50. hring tók hann fram úr Vettel, og sex hringjum seinna framúr Bottas. Þá var Max kominn upp í annað sætið, tæpum sex sekúndum á eftir Leclerc og 5 hringir eftir.

Á 68. hring af 71 var Verstappen komin innan við sekúndu á eftir Charles, sem þýddi að Hollendingurinn gat nýtt sér DRS búnaðinn til framúraksturs. Í þriðju beygju komst hann inn fyrir Ferrari ökuþórinn en Leclerc hélt betri línu í fjórðu beygju og hélt forustunni.

Strax á næsta hring komst Max í sömu stöðu í beygju þrjú. Núna gaf hann keppinaut sínum minna pláss í ytri línunni og komst framúr.

Hollensku áhorfendurnir gjörsamlega trylltust við að sjá hetjuna sína komast upp í fyrsta sætið úr því áttunda í byrjun kappakstursins. 

Verstappen kláraði síðasta hringinn af miklu öryggi og stóð uppi sem sigurvegari eftir magnaðann akstur. Sigurinn kom á heimavelli Red Bull og má vægast sagt segja að liðið hafi verið í skýjunum.

Dómarar lengi að ákveða sig

Charles Leclerc og Max Verstappen fæddust með sextán daga millibili árið 1997. Getty

Leclerc var allt annað en sáttur við aksturlag Verstappen og dómarar virtust sammála og tóku atvikið fyrir. Heilum þremur klukkutímum eftir að flaggið féll kom lokaniðurstaða í málið. Dómarar dæmdu atvikið sem eðlilegt kappaksturs atvik og refsuðu Verstappen því ekkert.

Ferrari unnu síðast í Austurríki árið 2003 með Michael Schumacher. Annað sæti Charles þýðir að ítalska liðið verður að bíða í að minnsta kosti eitt ár í viðbót eftir sigri þar í landi.

Akstur Max á sunnudaginn var algjörlega magnaður, til að setja hraða Hollendingsins í samhengi hringaði hann liðsfélaga sinn á næstsíðasta hring. Verstappen keyrði því að meðaltali rúmlega einni sekúndu á hring hraðar en Pierre Gasly þótt ökumennirnir væru á nákvæmlega eins bílum.

Red Bull liðið skipti yfir í Honda vélar fyrir tímabilið og var sigurinn sá fyrsti fyrir vélarframleiðandann síðan Jenson Button vann keppni fyrir Honda árið 2006.

Mercedes loksins ekki í fyrsta sæti

Verstappen tryggði Honda sinn fyrsta sigur í tæp þrettán ár. Getty

Þetta var fyrsta keppnin í ár sem að Mercedes vinnur ekki og þurfti Valtteri Bottas að sætta sig við þriðja sætið. Hamilton varð fimmti eftir að hafa þurft að skipta um framvæng um miðbik keppninnar.

Báðir Mercedes bílarnir voru í hitavandamálum. Ekki skrítið þar sem mikil hitabylgja er í Evrópu um þessar mundir og fór brautarhitinn á Red Bull brautinni mest upp í 60 gráður á celsíus.

Úrslitin þýða að Max Verstappen hoppar upp í þriðja sæti heimsmeistaramótsins og Valtteri Bottas minnkar muninn í Hamilton niður í 31 stig.

Næsta keppni fer fram á Silverstone brautinni í Bretlandi. Mörg lið hafa bækistöðvar sínar þar í landi og verður því mikið í húfi fyrir bæði lið og ökuþóra eftir tvær vikur.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.