Markalaust í Íslendingaslag í Svíþjóð

Jafntefli varð niðurstaðan í Íslendingaslag dagsins í toppbaráttunni í sænsku úrvalsdeildinni í fótbolta.

Arnór Ingvi Truastason var í byrjunarliði Malmö sem sótti AIK heim í toppslag. Kolbeinn Sigþórsson var á bekknum hjá AIK en kom inn á eftir 74 mínútna leik.

Ekkert mark var skorað í leiknum og það kom aðeins eitt skot á markið, það áttu gestirnir í Malmö. Alls áttu þeir átta marktilraunir en AIK fjórar.

Malmö er á toppnum í sænsku deildinni með 31 stig. AIK kemur þar á eftir með 25 stig. AIK á þó í hættu að missa Djurgården upp fyrir sig, Djurgården er með 24 stig í þriðja sætinu en á tvo leiki inni á bæði AIK og Malmö.