Jónsmessudagskrá víða um landið

Árbæjarsafnið stendur einnig fyrir Jónsmessugöngu sem hefst klukkan 22.30 annað kvöld. Gengið verður frá Árbæjarsafni og niður í Elliðaárdal. Stefán Pálsson sagnfræðingur leiðir gönguna.

Miðsumarhátíðin Reykjavík Midsummer music er haldin í Hörpu í sjöunda sinn. Hún hófst á fimmtudaginn og stendur til morguns.

Í Hraunborgum í Grímsnesi er mikið um að vera um helgina en þar er haldin miðsumarhátíð að sænskum sið. Gestir eru hvattir til að mæta með hljóðfærin sín og allir koma saman um kvöldið og setja saman risa miðsumarband sem spilar fyrir gesti hátíðarinnar. Blómaskreytingasérfræðingur kennir blómaskreytingar og allir eru hvattir til að skreyta tjöldin sína og vagna. Sveitamarkaður verður á staðnum. Sundlaugar­partí fyrir unga sem aldna, boðið verður upp á bjórsmökkun, matarsmökkun, það verður uppistand og línudansar, reiptog, pokahopp, grillpartí og margt fleira.

Á Akureyri verður Jónsmessunni fagnað með 24 tíma hátíð sem hefst á hádegi í dag og stendur til hádegis á morgun. Dagskráin er fjölbreytt og hefst á Listasafninu á Akureyri með einleik Tuma Hrannar-Pálmasonar, sem þekktur er undir listamannsnafninu Flammeus. Hann leikur á gítar og syngur lög af plötu sinni The Yellow sem er væntanleg 4. júlí.

Í sundlaug Akureyrar verður sýnt dansverk og trúbador kemur og spilar fyrir laugargesti. Flamm­eus mun einnig mæta á staðinn og í kvöld mun tvíeykið Stórleikurinn þeyta skífum á bökkum sundlaugarinnar. Í sundlauginni verður boðið upp á vatnazúmba í dag milli kl. 17.00 og 18.00.

Á göngugötunni í miðbænum spilar hljómsveitin Omotrack frá klukkan 23.00-23.45. Á miðnætti verður svo hægt að dansa zúmba á Ráðhústorginu.

Ýmsar listsýningar og tónleikar verða í Listagilinu gestum að kostnaðarlausu. Víðsvegar um bæinn verður boðið upp á tónleika og ýmsa gjörninga. Nákvæma dagskrá má finna á visitakureyri.is.

Í Grímsey er um helgina sumarsólstöðuhátíð með fjölbreyttri dagskrá, fjölskylduratleik, lifandi tónlist, sjávarréttakvöldi, balli, varðeld og Brekkusöng og fleiru.

Á Kópaskeri er einnig sólstöðuhátíð um helgina þar sem nóg er um að vera. Andlitsmálning fyrir börnin, kaffi og matsala. Bryggjutónleikar verða í kvöld þar sem bæði heimamenn og gestir stíga á svið. Sérstakir gestir eru Kristján Kristjánsson, eða KK, og Páll Rósinkranz. Eftir tónleikana er ball í íþróttahúsinu með hljómsveitinni Legó. Hátíðin endar á morgun með fjölskyldugöngu út að Kópaskersvita og norður með ströndinni út að veggjabrotum fjárborgarinnar við flugvöllinn.

Þessi frétt birtist fyrst í Fréttablaðinu.