Viðskipti innlent

Nýjasta þotan frá Airbus gæti orðið framtíðarvél Icelandair

Kristján Már Unnarsson skrifar
Airbus A321XLR, í litum Air Lease. Stefnt er að því hún verði komin í rekstur hjá flugfélögum árið 2023.
Airbus A321XLR, í litum Air Lease. Stefnt er að því hún verði komin í rekstur hjá flugfélögum árið 2023. Teikning/Airbus.

Airbus kynnti í dag ákvörðun um að hefja framleiðslu á langdrægustu farþegaþotu heims í flokki mjórra véla með einn farrýmisgang, Airbus A321XLR. Stefnt er að því að hún taki 180 til 220 farþega og verði komin í notkun hjá flugfélögum árið 2023.

Þetta er þróuð útgáfa af A320-línunni, en XLR stendur fyrir „extra long range“. Evrópski flugvélaframleiðandinn segir að flugdrægið verði 8.700 kílómetrar, 15% meira en á A321LR, og að eldsneytiseyðsla verði 30% minni á hvert sæti miðað við þær kynslóðir flugvéla sem henni er ætlað að leysa af hólmi. 

Við blasir að ráðamenn Icelandair munu taka þennan valkost til ítarlegrar skoðunar. Ekki eru nema sex vikur frá því forstjóri Icelandair, Bogi Nils Bogason, skýrði frá því að félagið væri að skoða þann möguleika að taka Airbus-vélar inn í flugflotann og skipta jafnvel öllum Boeing-vélunum út fyrir Airbus. 

Þetta nýjasta útspil Airbus virðist raunar sniðið að leiðakerfi Icelandair. Í fréttatilkynningu Airbus, sem kynnt var á flugsýningunni í París í dag, eru meira að segja tiltekin dæmi um að A321XLR-þotan muni komast í einum áfanga frá Reykjavík til Dubai og frá Reykjavík til Houston. Þotan dregur einnig frá Íslandi til bæði San Francisco og Los Angeles.

Kynningarspjald frá Airbus sem sýnir getu nýju flugvélarinnar. Takið eftir að flugdrægi er meðal annars sýnt frá Reykjavík. Teikning/Airbus.

Þannig virðist Airbus núna geta boðið sannfærandi arftaka Boeing 757-vélanna, en frá því framleiðslu þeirra var hætt fyrir 15 árum hafa flugfélög eins og Icelandair beðið eftir valkosti sem gæti leyst þær af hólmi. A321XLR gæti einnig að einhverju leyti komið í stað Boeing 767, sem Icelandair notar meðal annars á lengstu flugleiðum sínum. 

Helsta spurningin er hvort þetta langa flugdrægi XLR-þotunnar verði á kostnað burðarþols, hvort fullir geymar af eldsneyti þýði að fórna verði flugsætum á móti. Icelandair-menn munu einnig spyrja sig hvort stærri eldsneytisgeymar þýði minna rými fyrir frakt í lestunum, til dæmis fyrir ferskan fisk, en Boeing 757 þotur Icelandair nýtast vel til fiskflutninga með farþegafluginu. Þá nær nýja Airbus-þotan, með 101 tonna hámarksflugtaksþyngd, ekki að toppa 115 tonna hámarksflugtaksþyngd Boeing 757.

Icelandair-menn hafa áður lýst áhuga á Boeing 797, lítilli breiðþotu sem bandaríski flugvélaframleiðandinn er með á teikniborðinu, og var búist við því að Boeing myndi nýta flugsýninguna í París til að kynna þau áform sín. Það gerist ekki og hafa Boeing-menn kosið að láta lítið fyrir sér fara enda glíma þeir nú við ærinn vanda; sem er að koma Max-vélunum aftur á flug og sannfæra almenning um að óhætt verði að fljúga með þeim. 

Hér má sjá frétt Stöðvar 2 um fyrsta flug Airbus A321neo í janúar 2018:


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
EIK
2,75
23
450.310
REGINN
2,19
14
342.698
ICEAIR
2,1
26
150.345
HAGA
2,02
5
64.712
SKEL
1,62
5
101.370

Mesta lækkun dagsins


Félag
Br.%
Fjöldi
Velta*
BRIM
-0,83
5
1.252.011
ARION
-0,66
11
179.834
KVIKA
-0,48
2
4.035
Velkomin á Vísi. Þessi vefur notar vafrakökur. Sjá nánar.