Innlent

Fékk flogakast undir stýri og vagninn hafnaði utan vegar

Kristín Ólafsdóttir skrifar
Strætisvagninn hafnaði langt utan vegar, líkt og sjá má af þessum myndum af vettvangi nú á öðrum tímanum.
Strætisvagninn hafnaði langt utan vegar, líkt og sjá má af þessum myndum af vettvangi nú á öðrum tímanum. Vísir/Jói K.

Strætisvagn hafnaði utan vegar við Álafosskvosina í Mosfellsbæ nú á öðrum tímanum. Samkvæmt upplýsingum frá Guðmundi Heiðari Helgasyni, upplýsingafulltrúa Strætó, virðist sem bílstjóri vagnsins hafi fengið flogakast við akstur og misst meðvitund með fyrrgreindum afleiðingum. Myndir frá vettvangi sýna að strætisvagninn hafnaði á grasflöt nokkuð langt utan vegar. Bílstjóri og farþegi voru fluttir á slysadeild með minniháttar áverka.

Þrír farþegar voru í vagninum, leið 7 úr Mosfellsbæ niður í Spöng, þegar slysið varð. Guðmundur hefur eftir lögreglu að bílstjórinn hafi verið meðvitundarlaus þegar viðbragðsaðilar komu að honum.

Bílstjórinn var þó kominn til meðvitundar þegar hann var fluttur á slysadeild ásamt einum farþega, samkvæmt upplýsingum frá lögreglu. Eru áverkar þeirra taldir minniháttar. Lögregla hafði ekki upplýsingar um afdrif hinna farþeganna en vinna stendur enn yfir á vettvangi.

Mikið lán að vagninn hafi haldist á hjólunum

Sigurbjörn Guðmundsson, varðstjóri hjá slökkviliði höfuðborgarsvæðisins á vettvangi, segir í samtali við fréttastofu að allir í vagninum virðist hafa sloppið vel frá slysinu og þá hafi aðstæður á slysstað verið nokkuð góðar. 

„Það var greinilegt hvað hafði gerst, strætó farið hér út af veginum fyrir ofan og runnið hérna niður talsverðan halla eftir bílastæði en hélst alltaf á hjólunum, sem var mikið lán.“

Töluvert viðbragð var vegna slyssins en auk lögreglu sendi slökkvilið dælubíl og þrjá sjúkrabíla á slysstað. Þá hefur annar vagnstjóri verið kallaður út og er leið 7 aftur komin á áætlun eftir óhappið, samkvæmt upplýsingum frá Strætó.

Fréttin hefur verið uppfærð.

Sjúkrabílar voru sendir á vettvang. Vísir/Jói K.
Vagninn hélst á hjólunum allan tímann, sem þykir mikil mildi. Vísir/Jói K.


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.