Íslenski boltinn

Blikar settu tíu mörk á tíu menn Magna

Ástrós Ýr Eggertsdóttir skrifar
Það var glatt á hjalla hjá Blikum
Það var glatt á hjalla hjá Blikum vísir/bára

Ellefu mörk og tvö rauð spjöld litu dagsins ljós í Boganum á Akureyri þegar Breiðablik sló Magna út úr Mjólkurbikarnum. KA vann stórsigur á Sindra á Hornafirði.

Leikurinn byrjaði af miklum krafti. Á annari mínútu skoraði Höskuldur Gunnlaugsson og á þeirri þriðju fékk Sveinn Óli Birgisson rautt spjald fyrir brot á Thomas Mikkelsen og vítaspyrna dæmd. Mikkelsen fór sjálfur á punktinn og skoraði.

Magnamenn áttu fyrsta skot sitt á markið á 14. mínútu sem Gunnleifur Gunnleifsson átti ekki í vandræðum með en tveimur mínútum síðar var komið mark frá Magna. Það kom úr vítaspyrnu eftir brot Damir Muminovic, Kristinn Þór Rósbergsson skoraði af öryggi.

Áður en hálftími var liðinn var þriðja vítaspyrna leiksins komin. Mikkelsen fór aftur á punktinn fyrir Blika og setti boltann af öryggi í þaknetið.

Aron Bjarnason kláraði fyrri hálfleik með marki fyrir grænklædda, staðan 4-1 í hálfleik.

Höskuldur Gunnlaugsson skoraði tvö mörk á þremur mínútum í upphafi seinni hálfleiks og fullkomnaði þrennu sína. Þórir Guðjónsson kom inn á sem varamaður eftir klukkutíma leik og hann skoraði tvö mörk með stuttu millibili stuttu seinna.

Þá náði Mikkelsen sér í þrennu með frábæru marki á 76. mínútu en hann var ekki hættur og skoraði tíunda mark Blika á 84. mínútu. Undir lokin fékk Arnar Geir Halldórsson að líta rautt spjald í liði Magna og þeir því tveimur færri síðustu mínúturnar.

Fleiri mörk náðu Blikar ekki að setja, leiknum lauk með 10-1 sigri.

Á Höfn voru gestirnir frá Akureyri sterkari aðilinn, en Sindramenn létu þá þó hafa fyrir hlutunum. Daníel Hafsteinsson og Brynjar Ingi Bjarnason gerðu sitt hvort markið fyrir KA í fyrri hálfleik og staðan 2-0 í leikhléi.

Í seinni hálfleik ákvað Hallgrímur Mar Steingrímsson að drepa leikinn, hann setti þrennu á tíu mínútna kafla og KA fór með öruggan 5-0 sigur.

Upplýsingar um úrslit og markaskorara eru fengnar frá Fótbolta.net.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.