Erlent

Lík fannst í ferðatösku á botni stöðuvatns

Andri Eysteinsson skrifar
Leitað að líkum kvenna í manngerðu stöðuvatni í Kýpur.
Leitað að líkum kvenna í manngerðu stöðuvatni í Kýpur. EPA/ Katia Christodoulou

Kýpverska lögreglan fann í dag tvær ferðatöskur í Kokkinolimni-vatni eftir að fjöldamorðinginn Nicos Metaxas hafði greint lögreglu frá því að hann hafi komið fórnarlömbum sínum fyrir í ferðatöskum og varpað þeim ofan í vatnið. AP greinir frá.

Önnur ferðataskan hefur verið færð upp á yfirborðið og hún opnuð. Illa farnar líkamsleifar auk steypuklumps blasti við lögreglumönnum þegar taskan hafði verið opnuð. Unnið er að því að koma hinni töskunni upp á yfirborð.

Hinn 35 ára gamli Metaxas, sem er fyrrum hermaður, viðurkenndi við yfirheyrslur að hafa varpað þremur líkum ofan í vatnið, fórnarlömbin eru talin vera kona sem hvarf í desember 2017 auk rúmenskra mæðgna sem hurfu í september 2016.

Málið hefur vakið óhug í Kýpur frá því að lík hinnar 38 ára gömlu Mary Tiburcio fannst í yfirgefnum námugöngum í nágrenni Kokkineolimni-vatns 14. Apríl síðastliðinn. Rannsókn leiddi lögreglu fljótlega til Metaxas en hann hafði átt í samskiptum við Tiburcio á stefnumótasíðu áður en að þau hófu samband. Sambandið varði, að sögn meðleigjanda Tiburcio í sex mánuði, áður en að Tiburcio hvarf ásamt sex ára gamallar dóttur hennar.

Við yfirheyrslur yfir Metaxas viðurkenndi hermaðurinn að hafa myrt fimm konur og tvær stúlkur í heildina og losað sig við lík þeirra. Lík þriggja kvenna höfðu fundist áður en að leit hófst í stöðuvatninu. Konurnar eru allar af erlendum uppruna og komu til Kýpur til þess að vinna.

Kýpverska lögreglan hefur verið harðlega gagnrýnd eftir að málið kom upp, almenningur hefur sakað lögreglu um að hafa ekki gert nóg við rannsóknir á mannshvörfunum þegar þau komu upp. Nú hefur verið sett af stað rannsókn á vinnubrögðum lögreglu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.