Innlent

Dómarar tilnefndir og verðlaunaðir

Stefán Ó. Jónsson skrifar
FÍT-verðlaunin voru veitt við hátíðlega athöfn í Tjarnarbíói á dögunum.
FÍT-verðlaunin voru veitt við hátíðlega athöfn í Tjarnarbíói á dögunum. Leifur Wilberg Orrason

Ómögulegt er að koma í veg fyrir að dómnefndarmeðlimir veiti sjálfum sér viðurkenningar á FÍT-verðlaununum, að mati formanns Félags íslenskra teiknara. Geirinn sé einfaldlega fámennur á Íslandi og mikil skörun innan hans. Engu að síður sé reynt að standa faglega að dómnefndarstörfunum og víki dómarar t.a.m. þegar verk þeirra eru tekin til umfjöllunar.

FÍT-verðlaunin voru veitt í Tjarnarbíói í liðinni viku. Þau eru veitt árlega og er þeim ætlað að fanga það besta í grafískri hönnun og myndskreytingum á Íslandi. Veitt voru verðlaun í 21 flokki í ár og birti Vísir lista yfir alla verðlaunahafa í gær.

Sjá einnig: Þessi hlutu viðurkenningar á FÍT-verðlaununum

Í aðdraganda verðlaunahátíðarinnar var gefið út veglegt rit þar sem greint var frá öllum verðlaunahöfum, dómnefndum, þeim sem hlutu viðurkenningar og tilnefningar í flokkunum 21. Ritið má nálgast hér.

Athygli vekur að í sex flokkum eru dómnefndarmeðlimir ýmist tilnefndir eða hljóta viðurkenningar - jafnvel fyrstu verðlaun í flokkunum sem þeir voru sjálfir að dæma.

Kristín Eva Ólafsdóttir með hluta þeirra 370 verka sem send voru inn í FÍT-verðlaunin í ár. MAGNÚS ELVAR JÓNSSON

Kristín Eva Ólafsdóttir, formaður Félags íslenskra teiknara, segir þess stöðu ekki vera einsdæmi. „Þetta kemur fyrir á hverju ári.“ Ástæðan sé í raun einföld. Starfsstétt teiknara á sviði grafískrar hönnunar, auglýsinga- og myndskreytinga sé fámenn á Íslandi. Auglýsingastofur séu að sama skapi ekki margar og því erfitt að komast hjá þeirri miklu skörun sem er innan stéttarinnar.

Þannig segir Kristín hvimleitt að fólkið sem er, reynslu og þekkingar sinnar vegna, best til þess fallið að sitja í dómnefndum sé einnig mikið hæfileikafólk á sínu sviði og eigi því fyllilega skilið að hljóta tilnefningar.

„Verðlaunahafarnir eru því alltaf vel að viðurkenningum sínum komnir, ef ekki þá yrði allt vitlaust,“ segir Kristín. Þrátt fyrir að Vísir hafi heyrt af óánægju með þetta fyrirkomulag frá ósáttum hönnuðum þá virðist engu að síður ríkja sátt um tilhögun FÍT-verðlaunaafhendingarinnar.

Kristín undirstrikar að reynt sé að sinna dómarastörfunum af mikilli fagmennsku. Þannig þurfi dómnefndarmeðlimir ætíð af yfirgefa fundarherbergið þegar nefndin tekur verk þeirra fyrir.

Aðspurð um hvort þetta fámenni gefi hreinlega ekki tilefni til að endurskoða fyrirkomulagið á verðlaunaafhendingu segist Kristín ekki útiloka það. Kannski væri rétt að fá erlenda dómara til að taka þátt í ferlinu í auknum mæli. Þó má ætla að því fylgi aukinn kostnaður og tilstand. Ekki var þó á að henni að skilja að slíkar breytingar væru í farvatninu.

Uppfært kl. 13:30
Kristín Eva vill bæta því við að sex dómarar sitji í hverri dómnefnd fyrir sig, sem dæmi að meðaltali 5 til 6 flokka. Því séu alltaf a.m.k. fimm dómarar sem dæma hvern flokk, sé einhver þeirra vanhæfur. Er þetta fyrirkomulag haft á til að auka enn frekar fyrrnefnda fagmennsku við dómararstörfi, að sögn Kristínar. 

„Við val á fólki í dómnefnd er passað einstaklega uppá að viðkomandi hafi sérþekkingu á viðfangsefninu, sé jafnt skipt eftir auglýsingastofum og hlutfalli sjálfstætt starfandi hönnuða. Einnig er passað uppá að kynjahlutfall sé jafnt. Við treystum á faglegt og heiðarlegt mat dómnefndarmeðlima og höfum farið að erlendum fyrirmyndum við þróun keppninnar,“ segir Kristín.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.