Kynntu Viggó til leiks með fimmtán ára gamalli mynd af honum og Kretzschmar

Íslenski handboltamaðurinn Viggó Kristjánsson er á leiðinni í þýsku úrvalsdeildinni eins og Vísir sagði frá í dag. Viggó var kynntur á heimasíðu Leipzig í dag.

Viggó gerði eins árs samning með möguleika á einu ári til viðbótar. Viggó hefur þegar skorað 146 mörk á tímabilinu með West Wien, 99 í deildarkeppninni og 47 í úrslitakeppninni. Hann er einn af markahæstu mönnunum í austurrísku deildinni.

Leipzig kynnti íslenska leikmanninn til leiks með því að birta fimmtán ára gamla mynd af honum og þýskri handboltagoðsögn.

„Þess vegna spila ég alltaf í treyju númer 73,“ segir Viggó þegar hann hann var spurður út í myndina af honum og Stefan Kretzschmar frá árinu 2004. Stefan Kretzschmar skoraði 821 mark í 218 landsleikjum fyrir Þýskaland á sínum tíma en hann er einmitt frá Leipzig. 

Með fréttinni um félagsskiptinn þá mátti líka lesa stutt viðtal við Seltirninginn.

„Það hefur alltaf verið markmið hjá mér að spila í Bundesligunni. Ég hef verið að spila í Austurríki undanfarin tvö ár og nú er rétti tíminn til að taka næsta skrefið á mínum ferli. Þegar ég frétti af áhuga SC DHfK Leipzig þá fór ég til Leipzig til að kynna mér klúbbinn betur. Eftir jákvæðar viðræður við Karsten Günther og André Haber þá var þetta mjög auðveld ákvörðun fyrir mig,“ sagði Viggó í viðtali á heimasíðu Leipzig.

„Ég kynntist liðinu þegar ég kom til Leipzig og hef líka horft á síðustu leiki liðsins. Leipzig er með mjög gott lið og það eru mikil gæði í leikmannahópnum. Þetta er líka metnaðarfullt félag sem vill berjast fyrir Evrópusæti. Ég vil sýna mína hæfileika í Leipzig og hjálpa félaginu að ná þessum metnaðarfullu markmiðum. Ég von að ég og Franz Semper myndum gott tvíeyki á hægri vængnum á næsta tímabili. Við höfum ólíka styrkleika og getum báðir hjálpað liðinu,“ sagði Viggó.