Gunnar: Burns er öflugri en Alves

Gunnar Nelson stígur inn í búrið í Kaupmannahöfn næstkomandi laugardag er hann berst við Brasilíumanninn Gilbert Burns.

Gunnar átti upphaflega að berjast við Thiago Alves en sá varð að draga sig úr bardaganum vegna veikinda. Burns bauð fljótt fram þjónustu sína og Gunnar var aldrei í vafa um að þiggja bardagann.

„Ég er búinn að æfa í tvo mánuði fyrir bardagann og það er ekkert verra en að missa andstæðing,“ sagði Gunnar á hóteli bardagakappanna í Kaupmannahöfn í dag.

„Hann er öflugri en Alves. Hann er mjög góður í jörðinni. Alves er stórt nafn og gömul kempa en Burns er sterkari.“

Burns er margfaldur heimsmeistari í brasilísku jiu jitsu þannig að það verður ekki auðvelt fyrir okkar mann að fara í jörðina með honum.

„Við byrjum aðeins að pikka og pota. Við verðum nú að fara eitthvað í jörðina. Ég mun spila þetta eftir eyranu. Auðvitað reyni ég að slá hann aðeins áður en við förum niður. Sjáum til.“

Þetta ku vera næstsíðasti bardaginn á núverandi samningi Gunnars við UFC. Það er því mikið undir.

„Ég hef ekkert verið að spá í því. Ég ætla að vinna þennan bardaga. Síðan förum við að hugsa um þennan samning. Mér finnst líklegt að þeir komi með eitthvað en það væri sterk samningsstaða að vinna þennan öruggt.“