Kim Kardashian og Kanye West eiga von á dreng

Kim Kardashian var í viðtali í Watch What Happens Live hjá spjallþáttastjórnandanum Andy Cohen á dögunum ásamt systrum sínum. Í viðtalinu staðfesti Kim að staðgöngumóðir hjónanna gengi með dreng.

Cohen spurði hvort þau hjónin vissu kyn barnsins og svaraði Kim einfaldlega: „Við vitum það, það er strákur.“ Svar Kim kom systur hennar Kourtney verulega á óvart og hrópaði hún af undrun þegar systir hennar uppljóstraði kyninu.

„Ha?,“ sagði Kourtney og bætti svo við að hún vissi að þau ættu von á dreng en það kom henni verulega á óvart að systir hennar hafi uppljóstrað því í þættinum.

Marga hefur grunað að hjónin ættu von á dreng en fyrir eiga þau tvær dætur og einn son. Kim sagðist þó halda að margir vissu það þar sem hún hafði orðið drukkin í jólaveislu fjölskyldunnar, sagt einhverjum frá því og gæti nú ekki munað hverjum hún hafi sagt það.

„Ég verð aldrei drukkin,“ bætti Kim við að lokum.