Kjötfjallið minnkar á milli ára

Rúmlega 757 tonn af kindakjöti voru til í landinu í lok ágústmánaðar. Þetta kemur fram í svari Kristjáns Þórs Júlíussonar sjávarútvegs- og landbúnaðarráðherra við fyrirspurn Þorsteins Sæmundssonar þingmanns Miðflokks.

Þorsteinn spurði ráðherra út í birgðastöðu sauðfjárafurða og breytingar milli ára. Fram kemur í svari ráðherra að í lok ágústmánaðar í fyrra hafi tæplega 1.200 tonn af kjöti verið til í landinu. Í lok ágústmánaðar á þessu ári hafi staðan verið 757 tonn og því hefur kjötfjallið í minnkað um rúm 430 tonn á milli ára.

Þorsteinn óskaði einnig eftir upplýsingum um birgðastöðu einstakra sláturleyfishafa en ráðherra sagðist ekki geta svarað þeirri spurningu þar sem um væri að ræða upplýsingar er varða viðskiptahagsmuni fyrirtækja.