Óttast skaðabótakröfur í kjötmálinu

Sjávarútvegs- og landbúnaðarráðherra óttast að ríkið skapi sér skaðabótaskyldu ef ekki verður brugðist við niðurstöður Hæstaréttar um innflutning á fersku kjöti. Hann á von á því að frumvarp þessa efnis verði lagt fram í febrúar á næsta ári.

Hæstiréttur komst að þeirri niðurstöðu í síðustu viku að ríkinu sé óheimilt að hefta innflutning á fersku kjöti frá ríkjum Evrópusambandsins. Héraðsdómur Reykjavíkur og EFTA dómstóllinn höfðu áður komist að sambærilegri niðurstöðu.

Birgir Þórarinsson þingmaður Miðflokks spurði ráðherra út í málið á Alþingi í dag og hvernig stjórnvöld hyggjast bregðast við þessum dómi.

„Mun ráðherra nú leggja fram frumvarp sem heimilar allan innflutning á hráum matvöru og öðrum dýraafurðum, innmat, gærum o.s.frv., og stefna þar með okkar hreina landbúnaði í hættu?“ spurði Birgir.

Kristján Þór Júlíusson sjávarútvegs- og landbúnaðarráðherra sagði von á frumvarpi í febrúar.

„Á þingmálaskrá minni er gert ráð fyrir frumvarpi í febrúar á næsta ári þar sem tekið er á niðurstöðu dómsmálanna. Ég get ekki svarað neinu til um það á þessari stundu hvernig það mun líta út, það er enn í smíðum,“ sagðir Kristján.

Jón Steindór Valdimarsson þingmaður Viðreisnar segir að niðurstaða Hæstaréttar hafi verið fyrirsjáanleg og því sé brýnt að stjórnvöld bregðist við henni sem fyrst. Hann segir alvarlegt ef innflutningsfyrirtæki þurfi að bíða í marga mánuði eftir viðbrögðum stjórnvalda.

„Ég óttast að þarna geti ríkið verið að baka sér skaðabótaskyldu og ég hef af því áhyggjur fyrir hönd ríkissjóðs,“ sagði Jón Steindór.

Ráðherra sagðist deila þessum áhyggjum.

„Niðurstaða Hæstaréttar er mjög skýr og afdráttarlaus og liggur klárlega fyrir. Ég tók hins vegar eftir því í fréttum í gær, minnir mig, þar sem framkvæmdarstjóri Félags atvinnurekenda tjáði sig í spjallþætti, að hann mæltist til þess og ræddi þetta á þann veg að eðlilegt væri að við reistum varnir gegn salmonellu og kampýló og þegar þær lægju fyrir leiddum við þetta í lög. Ég deili alveg þeirri skoðun,“ sagði Kristján.