Góð kjörsókn í leiðtogaprófkjöri Sjálfstæðisflokksins

Kjörstaðir í leiðtogaprófkjöri sjálfstæðismanna í borginni opnuðu klukkan tíu í morgun. Kjörsóknin á fyrsta klukkutímanum var afar góð í samanburði við undangengin ár, að sögn formanns Varðar, fulltrúaráðs sjálfstæðisfélaganna í Reykjavík.

Fimm eru í framboði, fjórir karlar og ein kona. Það eru þau Áslaug Friðriksdóttir, Eyþór Arnalds, Kjartan Magnússon, Viðar Guðjohnsen og Vilhjálmur Bjarnason.

Gísli Kr. Björnsson, formaður Varðar, segir að á þriðja hundrað manns hafi verið búnir að kjósa kl. 11. Þá höfðu á sjötta hundrað manns greitt atkvæði utan kjörfundar.

Hann segir mikinn hug í sjálfstæðismönnum fyrir borgarstjórnarkosningarnar og segir gaman að sjá hversu margir hafi áhuga á leiðtogasætinu.

„Sjálfstæðisflokkurinn á mörg góð efni í borgarstjórastólinn, það er ekki spurning,“ segir Gísli.

Kjörstaðir loka kl. 18 en Gísli gerir ráð fyrir að fyrstu tölur liggi fyrir í kringum kvöldmatarleytið.