Keflvíkingar afhjúpa nýjan búning með dramatísku myndbandi

Tímabilið í Domino's deildunum fer að hefjast, keppni hefst í karla og kvennaflokki í næstu viku. Liðin eru að leggja lokahönd á undirbúning sinn og Keflvíkingar kynntu í dag nýjan keppnisbúning með dramatísku myndbandi.

Keflavík datt út í 8-liða úrslitum Domino's deildar karla og undanúrslitum Domino's deildar kvenna á síðasta tímabili. Keflvíkingar fögnuðu þó bikarmeistaratitli í kvennaflokki.

„Nýtt tímabil, nýir þjálfarar, nýir búningar, sama stoltið,“ segir í dramatísku kynningarmyndbandi sem Keflavík sendi út í dag þar sem nýju búningarnir fyrir næsta tímabil eru kynntir. Myndbandið má sjá hér neðst í fréttinni.

Keflavík hefur leik í Domino's deild karla eftir viku með grannaslag við Njarðvík. Konurnar byrja á miðvikudaginn á heimaleik við Stjörnuna. Upphitunarþáttur fyrir Domino's deild karla verður á Stöð 2 Sport í kvöld þar sem farið verður vel yfir komandi tímabil.