Pétur Gunnarsson fallinn frá

Blaðamaðurinn Pétur Gunnarsson er látinn, 58 ára að aldri. Hann lést á líknardeild Landspítalans í gærkvöldi eftir að hafa greinst með krabbamein í lok júlí í fyrra.

Á ferli sínum kom Pétur víða við. Að loknu stúdentsprófi starfaði hann sem lögreglumaður áður en hann fór út í blaðamennsku. Hann var lengi vel á Morgunblaðinu áður en hann fór yfir á Fréttablaðið þar sem hann var fréttastjóri á fyrstu árum blaðsins. Hann varð síðar meir ritstjóri vefmiðilsins Eyjunnar og vann einnig sem fréttastjóri á Viðskiptablaðinu.

Pétur var kvæntur leikskólastjóranum Önnu Margréti Ólafsdóttur en þau áttu þrjú börn og fjölda barnabarna.

Sjöunda nóvember síðastliðinn ritaði Pétur færslu á Facebook þar sem hann greindi frá því að nýr kafli væri að hefjast í lífi hans. Meinið hefði sótt á og lyfjameðferð hætt og að fram undan væri flutninga af krabbameinsdeild yfir á líknardeild.

Hans hefur verið minnst á Facebook eftir að ljóst var að hann var fallinn frá.

Þar á meðal er Sólveig Anna Jónsdóttir, formaður Eflingar, sem var systir hans. Hún segir Pétur hafa kvatt umvafinn ást fjölskyldu sinnar.

Grímur Atlason segist hafa kvatt vin sinn á líknardeildinni í liðinni viku og segist eiga eftir að sakna vinar síns og samtala þeirra.

Fjölmiðlamaðurinn Björn Ingi Hrafnsson minnist vinar síns Péturs á Facebook sem segir Pétur hafa verið mikið gæðablóð, frábæran blaðamann og skarpan samfélagsrýni.