Landsbankinn selur 9,2 prósenta eignarhlut í Eyri Invest

Landsbankinn hefur selt 9,2 prósenta eignarhlut í fjárfestingafélaginu Eyri Invest hf. í opnu söluferli. Söluandvirði hlutanna nemur um 3,9 milljörðum króna.

Í tilkynningu frá bankanum segir að frestur til að skila inn tilboðum í söluferlinu var til hádegis í gær og tók bankinn fjórum tilboðum af fimm sem bárust í 91.509.035 hluti í Eyri Invest.

„Allir hlutirnir voru seldir á sama sölugengi sem var 42,845 krónur á hvern hlut. Tilboði sem var undir sölugengi var hafnað,“ segir í tilkynningunni.

Landsbankinn auglýsti opið söluferli á allt að 12,1 prósenta eignarhlut sínum í fjárfestingafélaginu þann 6. nóvember síðastliðinn. Bankinn átti fyrir söluferlið 22 prósenta hlut í félaginu.

„Söluferlið fór fram í samræmi við stefnu Landsbankans um sölu eigna og var öllum opið sem teljast vera hæfir fjárfestar skv. skilgreiningu 9. tl. 43. gr. laga nr. 108/2007, um verðbréfaviðskipti. Lágmarksgengi sem fjárfestar gátu boðið í söluferlinu var 41,80 krónur á hvern hlut í Eyri Invest,“ segir í tilkynningunni.