Seðlabankinn slakar á innflæðishöftum

Seðlabanki Íslands ákvað í dag að slaka á innflæðishöftunum svokölluðu með breytingu á reglum um bindiskyldu vegna innstreymis erlends gjaldeyris.

Breytingarnar, sem eru háðar samþykki fjármála- og efnahagsráðherra, fela í sér lækkun á bindingarhlutfalli reglnanna úr 40% í 20%.

Vegna mikillar eftirspurnar erlendra aðila ætti breytingin á innflðishöftunum að leiða til styrkingar á gengi íslensku krónunnar sem mun vega upp á móti veikingu síðustu vikna en aðilar á markaði eins og starfsmenn fjármála- og verðbréfafyrirtækja hafa lengi kallað eftir því að reglunum um bindiskyldu verði breytt.

Hin sérstaka bindingarskylda á fjármagnsinnstreymi á skuldabréfamarkað og í hávaxtainnstæður, sem er oft nefnd innflæðishöft í daglegu tali, var sett á í júní 2016 með það að markmiði að tempra og hafa áhrif á samsetningu innstreymis erlends fjármagns á innlendan skuldabréfamarkað og hávaxtainnstæður og til að styrkja miðlunarferli peningastefnunnar.

Á vef Seðlabankans þar sem greint er frá ákvörðun bankans kemur fram að nú hafi myndast aðstæður til að lækka bindingarhlutfallið með minni vaxtamun gagnvart útlöndum og lægra gengi krónunnar.