Erlent

Trump og Fox í eina sæng í kosningabaráttunni

Samúel Karl Ólason skrifar
Trump tekur á móti Hannity á sviðinu.
Trump tekur á móti Hannity á sviðinu. AP/Jeff Roberson
Náið samband Donald Trump, forseta Bandaríkjanna, og Fox News, hefur aldrei verið ljósara en það var á kosningafundi Trump í Mississippi í gærkvöldi. Þáttastjórnendur Fox fóru á svið með forsetanum og endurfluttu kosningaáróður hans, gagnrýndu fjölmiðlafólk og lofuðu Trump í hástert. Þá hrósaði forsetinn Fox sömuleiðis og sagði starfsmenn sjónvarpsstöðvarinnar hafa unnið „ótrúlegt starf fyrir okkur.“

Sean Hannity, starfsmaður Fox og vinur Trump, fór upp á svið með forsetanum og tók beinan þátt í kosningabaráttu hans, þrátt fyrir að hafa sagt klukkustundum áður að hann myndi ekki gera það.

Það var nánast fyrsta verk Trump þegar hann mætti á svið að kalla á Hannity. Áður en forsetinn kallaði Hannity upp á svið hrósaði hann Fox og sagði starfsmenn sjónvarpsstöðvarinnar mjög sérstaka.



„Þau hafa unnið ótrúlegt starf fyrir okkur. Þau hafa verið með okkur frá upphafi,“ sagði Trump. Skömmu áður hafði Trump verið í beinni útsendingu Hannity frá kosningafundinum. Eftir viðtal þeirra þar gáfu Hannity og Bill Shine hvorum öðrum fimmu. Shine er núverandi samskiptastjóri Hvíta hússins en fyrrverandi forstjóri Fox News.

Eftir að Trump kallaði Hannity upp á svið, með því að kynna hann sem „sérstakan gest“, nýtti hann ræðu sína meðal annars til þess að kalla fjölmiðlafólk í salnum „falsfréttir“. Það var í rauninni það fyrsta sem Hannity sagði á sviðinu.

Það er þó vert að benda á að starfsmenn fréttastofu Fox voru meðal þeirra blaðamanna sem Hannity kallaði „falsfréttir“. Þá er einnig vert að benda á að deilur hafa verið uppi á milli þáttastjórnenda Fox og blaðamanna stöðvarinnar. Þættir eins og þeir sem Hannity stjórnar eru ekki skilgreindir sem fréttaþættir og blaðamenn Fox hafa gagnrýnt hvernig stjórnendur þeirra sniðganga raunverulegan fréttaflutning Fox.

Sjá einnig: Áhorfendur kalla eftir brottrekstri sannsöguls fréttaþular Fox



Hannity notaði tíma sinn á sviðinu einnig til að lofa Trump í hástert og fór yfir meint afrek hans í Hvíta húsinu, án þess þó að hafa sannleikann að leiðarljósi. Hannity hrósaði Trump einnig fyrir það hve orkumikill hann væri og sagðist telja að enginn annar væri svo orkumikill.

Hannity sagðist ekki hafa átt von á því að vera kallaður upp á svið, þrátt fyrir að framboð forsetans hefðu verið búið að kynna þáttastjórnendann sem sérstakan gest á kosningafundinum.

Jeanine Pirro, sem er stjórnar einnig þætti á Fox, var sömuleiðis kölluð upp á svið. Trump sagði hana „koma mjög vel fram við okkur“. Auk þess að vera þáttastjórnandi Fox er Pirro höfundur bókarinnar; Liars, Leakers and Liberals: The Case Against the Anti-Trump Conspiracy.

Þegar hún steig á svið hvatti hún áhorfendur til að kjósa Trump og til þess að fá aðra til að kjósa Trump.

Talsmenn Fox hafa neitað að tjá sig um kosningafundinn við CNN. Hins vegar bendir miðillinn á að eftir að Hannity tók þátt í kosningaauglýsingu fyrir Trump árið 2016 sagði talsmaður Fox að fyrirtækið hefði ekki haft vitneskju af þátttöku Hannity í auglýsingunni og að hann myndi „ekki gera slíkt aftur í kosningabaráttunni“.


Tengdar fréttir

Fox-liðum fjölgar í Hvíta húsinu

Donald Trump, forseti Bandaríkjanna, hefur að undanförnu ráðið fjölda fólks í Hvíta húsið sem hann hefur séð á Fox News, uppáhald sjónvarpsstöð hans, þar sem stefnumál hans og aðgerðir eru iðulega hyllt.

Kínverjar og Rússar hlusta reglulega á einkasímtöl Trump

Þrátt fyrir að aðstoðarmenn Donald Trump, forseta Bandaríkjanna, hafi oft varað hann við því að kínverskir og rússneskir njósnarar hlusti reglulega á einkasímtöl hans úr iPhone síma sem hann á, heldur forsetinn áfram að notast við símann.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.