Innlent

Lögregla mun ekki aðhafast í máli Björns Braga

Jóhann K. Jóhannsson og Kolbeinn Tumi Daðason skrifa
Vísir
Lögreglan á Norðurlandi eystra mun ekki aðhafast í máli Björns Braga Arnarssonar, nema að framburður táningsstúlku sem hann hefur viðurkennt að hafa káfað á komi fram. Þetta kemur fram í skriflegu svari Bergs Jónssonar, aðstoðaryfirlögregluþjóns í rannsóknardeild lögreglustjórans á Norðurlandi eystra, til fréttastofu.

Eins og fram hefur komið í fjölmiðlum í dag hefur Björn Bragi stigið til hliðar sem spyrill í Gettu betur eftir að myndband af honum að káfa á sautján ára stúlku komst í dreifingu.

Sjá einnig: Björn Bragi biðst afsökunar á því að hafa káfað á sautján ára stúlku

Björn Bragi sendi yfirlýsingu frá sér í morgun vegna málsins það sem hann biður stúlkuna afsökunar á framferði sínu sem hann segir með öllu óásættanlega. Jafnframt kemur fram í yfirlýsingunni að Björn hafi átt samtal við móður stúlkunnar sem hann lýsir sem góðu.

Fram kom á DV.is í dag að Lögreglan á Norðurlandi eystra hefði staðfest að málið væri komið til formlegrar skoðunar hjá embættinu.

Í svari Bergs til fréttastofu í dag kemur fram að myndbandið hafi verið skoðað eftir hádegi og að niðurstaða rannsóknardeildar hafi verið sú að ekkert verði aðhafst af hálfu lögreglunnar, nema að fram komi framburður þolanda.

Áreitt en engin afsökunarbeiðni

Önnur ung kona, Þórhildur Gyða Arnarsdóttir, steig fram á Twitter í dag og sagðist hafa verið áreitt kynferðislega af Birni Braga. Hún sagðist vita um fleiri stúlkur sem hefðu lent í grínistanum. Engin afsökunarbeiðni hafi þó borist frá Birni Braga vegna þessa.

Hún segir það minnsta sem einstaklingur geti gert sé að biðjast afsökunar, það eigi að vera sjálfsagt mál.

Þórhildur Gyða veltir því þó fyrir sér hvað hefði gerst ef atvikið hefði ekki náðst á myndband. Hvort stúlkunni hefði verið trúað eða ekki.

Eftir að myndbandið fór í dreifingu hafi hún ekki getað setið á sér lengur.

„Ég hef verið áreitt kynferðislega af honum og fleirum. Hann er alls ekki sá eini. Ég hef aldrei sagt frá þessari kynferðislegu áreitni hans vegna þess að ég hélt að það myndi enginn trúa mér. Af því að ég á engar myndir. Ég á engin myndbönd. Samfélagið virðist einhvern veginn trúa þessu núna en mér finnst það svolítið bara vera út af þessu myndbandi,“ segir Þórhildur Gyða í samtali við Fréttablaðið.

Hún hvetur ungu stúlkuna sem tók myndbandið til að kæra áreitnina til lögreglu og fá rétti sínum framgengt. Stúlkan er sautján ára og því undir lögaldri.

Dóri DNA, Björn Bragi, Ari Eldjárn, Bergur Ebbi og Jóhann Alfreð skipa Mið-Ísland.Fréttablaðið/Valli

Lykilmaður í Mið-Íslandi

Björn Bragi hefur um árabil verið einn vinsælasti grínisti landsins. Hann er hluti af hinum vinsæla hópi Mið-Ísland sem notið hefur mikillar hylli og sýnt fyrir fullum Þjóðleikhúskjallara og víða undanfarin ár.

Jóhann Alfreð Kristinsson, vinur og félagi Björns Braga í Mið-Íslandi, vildi ekki tjá sig um stöðu Björns Braga í grínhópnum þegar Mbl.is heyrði í honum hljóðið í dag. Mið-Ísland hefur ekki tjáð sig um málið á samfélagsmiðlum sínum í dag.

Uppistand Björns Braga sem fara átti fram í lok nóvember var blásið af í dag. Mikið hefur verið rætt um Björn Braga á samfélagsmiðlum í dag og sýnist sitt hverjum. Hugleikur Dagsson skopmyndateiknari er meðal þeirra sem lagt hafa orð í belg.





Þá velta Valsmenn fyrir sér hvort Björn Bragi verði á meðal þeirra sem troði upp á herrakvöldi félagsins á föstudaginn.

MeToo

Tengdar fréttir

Mest lesið


Fleiri fréttir

Sjá meira


×

Mest lesið