Innlent

Þingmennirnir fylgdust með flugæfingum á flugmóðurskipinu

Jakob Bjarnar skrifar
Hér er hinn káti hópur á dekki flugmóðurskipsins, klár í slaginn.
Hér er hinn káti hópur á dekki flugmóðurskipsins, klár í slaginn. Bandaríski sjóherinn
Utanríkisráðherra og nokkrir þingmenn í utanríkismálanefnd og þingmannanefnd NATO fengu höfðinglegar móttökur þá er þeim var boðið sérstaklega í kynningarferð í flugmóðurskipinu USS Harry S. Truman.

Vísir greindi frá þessu ferðalagi þingmannahópsins í gær og leitaði í framhaldinu frekari upplýsinga hjá Bandaríska sjóhernum. Nánar tiltekið Lauru K. Stegherr sem er upplýsingastjóri en hún var svo vinsamleg að senda okkur fáeinar myndir af hópnum um borð.

Guðlaugur Þór og Þorgerður Katrín um borð í flugmóðurskipinu mikla.Bandaríski sjóherinn
Að sögn Stegherr er USS Harry S. Truman nú á ferð um norðurslóðir til að gæta að öryggi bandamanna á norðurslóðum, tryggja friðinn og styrkja vinaböndin. Meðal Íslendinga sem fóru þessa siglingu eru áðurnefndur Guðlaugur Þór Þórðarson utanríkisráðherra, Þorgerður Katrín Gunnarsdóttir formaður Viðreisnar, Smári McCarthy þingmaður Pírata, Albertína Friðbjörg Elíasdóttir þingmaður Samfylkingarinnar og Njáll Trausti Friðbertsson þingmaður Sjálfstæðisflokksins auk ásamt starfsfólks varnarmálaskrifstofu utanríkisráðuneytisins.

Hópurinn saman kominn við sérstaka orrustuþotu hersins.bandaríski sjóherinn
Guðlaugur Þór flutti stutta tölu um borð þar sem hann talaði um mikilvægi samstarfsins í NATO og var gerður góður rómur að orðum hans.

Mikilvægi NATO

„Ísland er stofnaðili í NATO. Tengsl við bandamenn okkar þar eru sterk og traust. Við erum herlaus þjóð en við tökum engu að síður fullan þátt á forsendum hefðbundinna varna og aðgerðum á norðurslóðum. Þetta er frábært tækifæri til að styrkja tengslin,“ sagði Guðlaugur Þór meðal annars:

„Sagan hefur kennt, svo ekki verður um villst að mikilvægi NATO er ótvírætt. Og sagan mun áfram sýna að það er jafn mikilvægt nú og var að halda því varnarsamstarfi vakandi.“

Íslenski hópurinn hitti fyrir um borð þá Gene Black, sem er Strike Group Commander, Rear Adm. og Capt. Nick Dienna, Commanding Officer sem sýndi Íslendingunum stjórnstöðina í brúnni og þá fengu þeir að fylgjast sérstaklega með flugtaki af dekki flugmóðurskipsins. Þeir sögðust sérlega ánægðir með heimsóknina þegar þeir tóku á móti íslenska leiðangursfólkinu; að þeim væri heiður sýndur.

 

Umdeilt boð

Víst er að þó sjóherinn og utanríkisráðherra hafi verið ánægð með hvernig til tókst er tiltækið umdeilt. Þannig hefur Vísir greint frá því að Dagur B. Eggertsson borgarstjóri telji einsýnt að borgin muni óska eftir upplýsingum um flug bandarískra herflugvéla á Reykjavíkurvelli í gær en þær fluttu hópinn um borð í flugmóðurskipið. Lögum samkvæmt er umferð orrustuflugvéla bönnuð á Reykjavíkurflugvelli.

Þá liggur fyrir að Rósa Björk Brynjólfsdóttir, þingmaður VG, Logi Már Einarsson formaður Samfylkingarinnar og Gunnar Bragi Sveinsson þingmaður Miðflokksins og fyrrverandi utanríkisráðherra afþökkuðu hið góða boð um að fara í sjóferð og kynna sér starfsemina um borð í USS Harry S. Truman.

Nú eru yfirstandandi óundirbúnar fyrirspurnir á Alþingi og má vænta þess að málið verði tekið upp á þeim vettvangi.


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.