Tugir handteknir á andmarxískum mótmælafundi

Tugir voru handteknir í aðgerðum lögreglunnar í Berkeley í Kaliforníu í gær þegar til átaka kom á milli mótmælenda á „andmarxískum“ mótmælafundi.

Að því er fram kemur í yfirlýsingu frá lögreglunni voru mótmælendurnir handteknir fyrir ólöglegan vopnaburð en fyrir mótmælin hafði lögregla bannað ýmis konar hluti, svo sem hafnaboltakylfur og ísaxir, til að koma í veg fyrir ofbeldi. Lögreglan lagði hald á þónokkurt magn af slíku á mótmælunum.

Þrír særðust lítillega í mótmælunum þegar mótmælendur köstuðu sprengiefni í átt að lögreglu.

Í yfirlýsingu lögreglunnar segir: „Þrátt fyrir að hundruð mótmælenda hafi verið saman komin, og margir mótmælenda hafi borið vopn og sýnt af sér árásargjarna hegðun, urðu engin alvarleg meiðsl á fólki, hvorki almenningi né opinberum starfsmönnum.“

Lögreglan bætti þó við að mótmælendur hefðu sýnt af sér öfgakennda hegðun, enda hefðu þeir valdið umtalsverðum skemmdum á 21 bíl, skorið á dekk farartækja og gengið svo langt að kveikja í einum bíl.

Í kringum 500 manns fylktu liði á mótmælin, sem eiga rætur að rekja til mótmælafundar annars staðar í borginni, en hann bar yfirskriftina „No to Marxism in America,“ eða „Nei við Marxisma í Bandaríkjunum.“