Stjarnan áfram eftir vítaspyrnukeppni á Selfossi

Vítaspyrnukeppni þurfti til að fá úrslit í viðureign Selfoss og Stjörnunnar í 8-liða úrslitum Mjólkurbikars kvenna. Stjarnan hafði þar betur og spilar til undanúrslita í bikarnum en Selfoss er úr leik.

Eftir þokkalega tíðindalítinn fyrri hálfleik átti heldur betur eftir að draga til tíðinda í þeim seinni.

Fyrsta markið kom frá markadrottningunni Hörpu Þorsteinsdóttur á 53. mínútu eftir frábæra sendingu frá Láru Kristínu Pedersen. Heimakonur voru hins vegar búnar að jafna innan tíu mínútna. Kristín Rut Antonsdóttir skoraði eftir fyrirgjöf frá Karitas Tómasdóttur.

Augnabliki síðar veifaði Gunnar Oddur Hafliðason rauða spjaldinu og dæmdi Stjörnunni vítaspyrnu. Markmaður Selfyssinga Caitlyn Alyssa Clem fékk rautt spjald og inn kom varamarkvörðurinn Emma Mary Higgins. Katrín Ásbjörnsdóttir steig á vítapunktinn en Emma varði frá henni.

Bæði lið fengu færi til þess að skora sigurmarkið en það kom ekki og grípa þurfti til framlengingar. Framlengingin var nokkkuð róleg framan af en Magdalena Anna Reimus virtist hafa skotið Selfyssingum áfram í undanúrslitin þegar hún skoraði á 101. mínútu eftir fyrirgjöf og aftur var það Karitas sem setti boltann fyrir markið.

Stjarnan sótti stíft að marki Selfyssinga og uppskar loks þegar aðeins tvær mínútur voru eftir af framlengingunni. Harpa með sitt annað mark eftir undirbúning uppalda Selfyssingsins Guðmundu Brynju Óladóttur og vítaspyrnukeppni fram undan.

Heimakonur áttu fyrstu spyrnuna en Allyson Haran misnotaði hana. Guðmunda fór næst á punktinn gegn sínum gömlu félögum og skoraði.

Næstu átta spyrnur rötuðu allar á réttan stað í marknetið og Stjarnan stóð því uppi sem sigurvegari og fer áfram í undanúrslit.

Fyrr í kvöld höfðu Valur og Fylkir komist í undanúrslitin. Lokaleikur 8-liða úrslitanna er svo viðureign ÍR og Breiðabliks á morgun. Upplýsingar um markaskorara og úrslit eru fengnar frá Fótbolta.net.